სხვადასხვა მიზეზი ჰქონდა სამთავრობო ცვლილებებს, საბოლოო ჯამში, რა თქმა უნდა, ცვლილებები ემსახურება სისტემის კიდე უფრო მეტად გაჯანსაღებას, - ამის შესახებ პრემიერ-მინისტრმა ირაკლი კობახიძემ ქუთაისში ჟურნალისტებს განუცხადა.
მისივე თქმით, ყოველთვის, ნებისმიერ გუნდში საჭიროა განახლება და ბოლო დღეებში განვითარებული პროცესები კიდევ უფრო მეტად გააჯანსაღებს მთავრობის საქმიანობას.
„საუბარი არ მაქვს პერსონალურ საკითხებზე, ყოველთვის არის საჭირო განახლება ნებისმიერ გუნდში და ამ შემთხვევაშიც, ვფიქრობთ, რომ ის პროცესები, რომლებიც განვითარდა გასულ დღეებში, კიდევ უფრო მეტად გააჯანსაღებს მთავრობის საქმიანობას. ამას უზრუნველყოფს ის გუნდი, რომელიც დღეს არის ჩამოყალიბებული. ჩვენ გვყავს ძალიან კარგი გუნდი, რომელიც შედგება პროფესიონალებისგან, მათ შორის, ვგულისხმობ ახლად დანიშნულ თანამდებობის პირებს. ჩვენ ყველაფერს გავაკეთებთ იმისათვის, რომ გაგრძელდეს ქვეყნის ეფექტიანი, სწრაფი განვითარება,“- განაცხადა პრემიერმა.
შეგახსენებთ, წინა კვირაში ირაკლი კობახიძემ განაცხადა, რომ გაძლიერდება თანამშრომლობა მთავრობის ადმინისტრაციასა და სახელმწიფო აუდიტის სამსახურს შორის და დაინერგება რეალურ დროში აუდიტის პრაქტიკა. როგორც მან მთავრობის სხდომაზე აღნიშნა, მიზანი სამინისტროების მიერ განხორციელებული პროექტების ხარჯ ეფექტიანობისა და ხარისხის მაქსიმალური გაუმჯობესებაა. მოგვიანებით კი აღნიშნულ საკითხთან დაკავშირებით მთავრობის ადმინისტრაციის ხელმძღვანელის კომენტარი გავრცელდა, რომლის მიხედვითაც, "ოცნება" მთავრობის ეფექტიანობის დეპარტამენტს შექმნის. ლევან ჟორჟოლიანი განმარტავს, რომ ამისთვის პარლამენტში საკანონმდებლო ინიციატივა შევა.
აუდიტის სამსახურის განმარტებით, ახალი მიდგომა ტრადიციულთან ერთად იქნება გამოყენებული და ის საჯარო ფინანსების მართვაზე პასუხისმგებელი უწყებების მიმდინარე საქმიანობის შემოწმებას მოიაზრებს.
ფინანსების მართვაზე და ხარჯების ოპტიმიზაციაზე გაკეთებული განცხადებების შემდეგ კი გუშინ კი იგივე მთავრობამ განაცხადა, რომ ქვეყანაში დამატებით 14-ე სამინისტრო იქმნება. კერძოდ, რეგიონული განვითარებისა და ინფრასტრუქტურის სამინისტრო გაიყოფა და ცალკე უწყებად ჩამოყალიბდება რეგიონული განვითარების სამინისტრო. კომენტარების დონეზე გაკეთებული განცხადებების მიზანიც რეგიონულ განვითარებასთან დაკავშირებული ღონისძიებების მაქსიმალური ეფექტიანობისა და ხარჯეფექტიანობის უზრუნველყოფაა.
ახალ უწყებას სუს-ის აწ უკვე ყოფილი ხელმძღვანელი გრიგოლ ლილუაშვილი ჩაიბარებს, საქართველოს ინფრასტრუქტურის მინისტრის თანამდებობაზე მუშაობას კი ირაკლი ქარსელაძე აგრძელებს. თავის მხრივ სუსის ახალ ხელმძღვანელად გუშინ კობახიძემ ანრი ოხანაშვილი წარადგინა.
