ტრამპი მიიჩნევს, რომ ირანი ბირთვულ პროგრამასთან დაკავშირებით პირდაპირი მოლაპარაკებებისთვის მზადაა, – ამის შესახებ გამოცემა „ბლუმბერგი“ წერს.
„დაივიწყეთ წერილები, ვფიქრობ, მათ სურთ პირდაპირი მოლაპარაკებები“, – განაცხადა ტრამპმა.
როგორც აშშ-ის პრეზიდენტმა აღნიშნა, ირანთან პირდაპირი დიალოგი ურჩევნია, რადგან ეს დაეხმარება შეთანხმების მიღწევაში.
„ვფიქრობ, ასეთ შემთხვევაში ეს უფრო სწრაფად ხდება, პირდაპირი დიალოგის დროს გაცილებით უკეთ შეგიძლიათ, გაიგოთ, რას ფიქრობს მეორე მხარე, ვიდრე შუამავლების მეშვეობით. მათ სურდათ შუამავლების გამოყენება. არ ვფიქრობ, რომ ახლა ეს აუცილებელია. ვფიქრობ, ისინი შეშფოთებული არიან. ვფიქრობ, ისინი თავს მოწყვლადად გრძნობენ და არ მინდა, რომ თავს ასე გრძნობდნენ“, – აღნიშნა ტრამპმა.
30 მარტს დონალდ ტრამპი ირანს დაბომბვით დაემუქრა, თუ ირანი ბირთვულ შეთანხმებაზე უარს იტყვის. საპასუხოდ, ირანის სულიერმა ლიდერმა, აიათოლა ალი ხამენეიმ განაცხადა, რომ თავდასხმის შემთხვევაში ვაშინგტონი მძიმე საპასუხო დარტყმას მიიღებს. აშშ ითხოვს, რომ ირანმა უარი თქვას ბირთვულ პროგრამაზე. თეირანში აცხადებენ, რომ ბირთვული ენერგია მხოლოდ სამოქალაქო მიზნებისთვის სჭირდებათ და ბირთვული იარაღის შექმნა არ აქვთ განზრახული. ირანსა და დასავლეთს შორის 2015 წელს დადებული ბირთვული შეთანხმება დონალდ ტრამპმა პრეზიდენტობის პირველ ვადაში დატოვა. მას შემდეგ ირანმა ურანის გამდიდრების დონე გაზარდა.
წყარო: 1tv.ge
