SpaceX-ის პირველადი საჯარო შეთავაზება (IPO) ინვესტორების დიდ ინტერესს იწვევს. Reuters-ის ინფორმაციით, კომპანიის აქციებზე მოთხოვნამ უკვე $250 მილიარდს გადააჭარბა, მაშინ როდესაც SpaceX-ი IPO-ზე $75 მილიარდის მოზიდვას გეგმავს.
წყაროების ცნობით, IPO ამჟამად დაახლოებით 3.5-4-ჯერ გადაჭარბებულად არის გამოწერილი, რაც იმას ნიშნავს, რომ მსურველთა მოთხოვნა შეთავაზებული აქციების მოცულობას რამდენჯერმე აღემატება.
ინვესტორთა შორის განსაკუთრებით აქტიურობენ გრძელვადიანი საინვესტიციო ფონდები, რომლებმაც, წყაროების შეფასებით, ძალიან მსხვილი შეკვეთები განათავსეს. გავრცელებული ინფორმაციით, პოტენციურ ინვესტორებთან გამართულ რამდენიმე ონლაინშეხვედრაში თავად ილონ მასკმაც მიიღო მონაწილეობა.
მიუხედავად ძლიერი მოთხოვნისა, საბოლოო შედეგები IPO-ს ფასის განსაზღვრამდე, რომელიც ხუთშაბათს არის მოსალოდნელი, შესაძლოა შეიცვალოს. როგორც წესი, მსხვილი ინსტიტუციური ინვესტორების ნაწილი შეკვეთებს შეთავაზების ბოლო ეტაპზე ათავსებს.
SpaceX-ის IPO იმ პერიოდში ტარდება, როდესაც ფინანსურ ბაზრებზე მაღალი არასტაბილურობაა. Nasdaq-ის ინდექსმა გასულ კვირას ერთ წელზე მეტი ხნის განმავლობაში ყველაზე მკვეთრი ვარდნა განიცადა, ხოლო ბიტკოინის ფასი სამშაბათს დამატებით 2.8%-ით შემცირდა და იანვრის მაქსიმუმთან შედარებით 37%-ით დაბალ ნიშნულზეა.
SpaceX-ის საპრეზენტაციო მასალებში განსაკუთრებული ყურადღება ეთმობა კომპანიის სარაკეტო ბიზნესსა და Starlink-ის სატელიტურ ინტერნეტს. კომპანიის განცხადებით, ბოლო სამი წლის განმავლობაში ორბიტაზე გაგზავნილი ტვირთების უდიდესი ნაწილი სწორედ SpaceX-ის რაკეტების მეშვეობით იქნა ტრანსპორტირებული.
კომპანია ასევე ხაზს უსვამს ხელოვნური ინტელექტის მიმართულებას და აცხადებს, რომ ამ სფეროში $23-ტრილიონიანი საბაზრო შესაძლებლობა არსებობს. SpaceX-ის შეფასებით, მისი მთავარი უპირატესობა ისაა, რომ შეუძლია კოსმოსში განათავსოს მონაცემთა ცენტრები და AI-ინფრასტრუქტურა, რითაც დედამიწაზე არსებული ენერგეტიკული და ინფრასტრუქტურული შეზღუდვები გადაილახება.
კომპანიის განცხადებით, აშშ-ში ელექტროენერგიის გამომუშავება და გამოთვლითი სიმძლავრეების ზრდა ჩინეთთან შედარებით უფრო ნელია, ხოლო კოსმოსში მონაცემთა ცენტრების განთავსება ამ პრობლემის გადაჭრის ერთ-ერთ გზად განიხილება.
თუ SpaceX-ის IPO ისტორიაში ყველაზე მსხვილი პირველადი საჯარო შეთავაზება გახდება, ეს კომპანიის დამფუძნებელსა და აღმასრულებელ დირექტორს, ილონ მასკს, პირველ ტრილიონერად აქცევს. Forbes-ის შეფასებით, მსოფლიოს უმდიდრესი ადამიანი ამჟამად $792.8 მილიარდის ქონებას ფლობს.
