ისრაელის ენერგეტიკის უწყების ინფორმაციით, ხმელთაშუა ზღვაში მდებარე „Leviathan“-ის გაზის საბადო, რომელიც სამხედრო დაძაბულობის გამო დაახლოებით ერთი თვის განმავლობაში შეჩერებული იყო, კვლავ იწყებს ფუნქციონირებას.
აღნიშნული ობიექტი, რომლის ოპერატორია ამერიკული კომპანია Chevron, მუშაობას შეწყვიტა 28 თებერვალს, მას შემდეგ რაც რეგიონში ვითარება გამწვავდა და აშშ-სა და ისრაელის სამხედრო მოქმედებები ირანის წინააღმდეგ დაიწყო.
უწყებაში აცხადებენ, რომ არსებული მდგომარეობის შეფასებისა და უსაფრთხოების ფაქტორების გათვალისწინებით, მიღებულია გადაწყვეტილება პლატფორმის ეტაპობრივად ამუშავების შესახებ. მათი თქმით, ქვეყნის შიდა ბაზარზე გაზის მიწოდება არც შეჩერებულა და ახლა, დამატებითი ინფრასტრუქტურის ჩართვით, მოცულობა კიდევ უფრო გაიზრდება.
„Leviathan“ აღმოსავლეთ ხმელთაშუაზღვისპირეთის ერთ-ერთ ყველაზე დიდ საბადოდ ითვლება — მისი მარაგი დაახლოებით 635 მილიარდ კუბურ მეტრს აღწევს.
მიმდინარე წლის დასაწყისში Chevron-მა და პარტნიორებმა დაამტკიცეს პროექტი, რომელიც საბადოს გაფართოებას ითვალისწინებს. გეგმის ფარგლებში, იგეგმება ბუნებრივი აირის ექსპორტი, მათ შორის ეგვიპტეში, რომლის საერთო ღირებულება 35 მილიარდ დოლარს აჭარბებს.
გაფართოების შედეგად, წლიური წარმოება დაახლოებით 21 მილიარდ კუბურ მეტრამდე გაიზრდება. მოსალოდნელია, რომ გაზის ნაწილი თხევადი ბუნებრივი აირის (LNG) სახით გავა როგორც რეგიონულ, ისე ევროპულ ბაზრებზე.
