ევროკომისიის მიერ გამოცხადებული მიზნის მიღწევას, 2027 წლის ბოლომდე ევროკავშირში რუსული გაზის იმპორტის სრულად შეწყვეტის შესახებ, ნულოვანი კვოტის შემოღებით შეეცდებიან, იტყობინება Bloomberg ოთხშაბათს.
ევროკომისიის მიერ 6 მაისს სტრასბურგში წარდგენილ „საგზაო რუკაში“ აღნიშნული იყო, რომ „რუსული გაზის (მილსადენისა და თხევადი ბუნებრივი აირის) მომწოდებლებთან ახალი კონტრაქტები მიუღებელი იქნებოდა, ხოლო არსებული სპოტური კონტრაქტები 2025 წლის ბოლომდე შეწყდებოდა“. სრული აკრძალვა 2027 წლის ბოლოსთვის იგეგმება.
თუმცა, მას შემდეგ გაურკვეველი იყო, თუ რა ინსტრუმენტს გამოიყენებდა ევროკავშირი ამ გეგმის განსახორციელებლად, რადგან პირდაპირი სანქციების აკრძალვას 27-ვე ქვეყნის თანხმობა სჭირდება და ბრიუსელს უნგრეთისა და სლოვაკეთის მხრიდან მკაცრი წინააღმდეგობა შეხვდა. ევროპულმა მედიამ მაისში გაავრცელა ინფორმაცია, რომ ევროკომისია ამ წევრი სახელმწიფოების მიერ მოსალოდნელი ვეტოს თავიდან აცილების გზებს იკვლევდა.
Bloomberg–ი, საკუთარ წყაროებზე დაყრდნობით, იუწყება, რომ საზოგადოება, სავარაუდოდ, „აკრძალავს მიწოდებას ნულოვანი კვოტის გამოყენებით, რაც ფაქტობრივად სავაჭრო ზომაა, რომელიც შესაბამისი გადაწყვეტილების მისაღებად მხოლოდ კვალიფიციურ უმრავლესობას მოითხოვს“. სააგენტოს წყაროების ცნობით, ეს ევროპელ გაზის მყიდველებს საშუალებას მისცემს, რუს მომწოდებლებთან კონტრაქტები შეწყვიტონ ფორსმაჟორული გარემოებების მოხმობით.
