ევროკავშირი ადასტურებს თავის მტკიცე ვალდებულებას, კიდევ უფრო გააძლიეროს ურთიერთობები სომხეთთან და მხარი დაუჭიროს სომხეთის სუვერენიტეტს, მდგრადობას და ყოვლისმომცველ რეფორმების დღის წესრიგს, რომელიც დაფუძნებულია დემოკრატიის, ადამიანის უფლებების, ფუნდამენტური თავისუფლებებისა და კანონის უზენაესობის პატივისცემაზე, - ამის შესახებ ევროკავშირი-სომხეთის სამიტის შემდგომ გამოქვეყნებულ ერთობლივ დეკლარაციაშია აღნიშნული.
დოკუმენტის თანახმად, დღევანდელი სამიტი ევროკავშირ-სომხეთის ურთიერთობების გაღრმავების ისტორიულ ეტაპს აღნიშნავს.
„ის ასახავს ბოლო წლების მნიშვნელოვან მიღწევებს და ჩვენი პარტნიორობის სტრატეგიულ მნიშვნელობას, რომელსაც ხელშესახები სარგებელი მოაქვს როგორც სომხეთის, ასევე ევროკავშირის მოქალაქეებისა და ბიზნესებისთვის.
ევროკავშირი ასევე მხარს უჭერს სომხეთის მზადყოფნას, გააძლიეროს ორმხრივი პარტნიორობა სექტორული ინტეგრაციისა და ევროკავშირის კანონმდებლობასთან დაახლოების გზით. ევროკავშირი აღიარებს სომეხი ხალხის ევროპულ მისწრაფებებს, რომელიც ეფუძნება 2025 წლის მარტში „სომხეთის ევროკავშირში გაწევრიანების პროცესის დაწყების შესახებ კანონის“ მიღებას, რაც გამოხატავს ქვეყნის განზრახვას, ევროკავშირისკენ სვლა განახორციელოს. კიდევ ერთხელ ვადასტურებთ, რომ სომხეთის მომავალი მისმა მოქალაქეებმა უნდა განისაზღვრონ, თავისუფლად და დემოკრატიულად“, - აღნიშნულია დოკუმენტში.
განცხადების თანახმად, 270 მილიონი ევროს ოდენობის მდგრადობისა და ზრდის გეგმა აგრძელებს სომხეთის სოციალურ-ეკონომიკური რეფორმების დღის წესრიგის წინსვლის, სექტორული თანამშრომლობის გაძლიერების და ენერგეტიკის, ტრანსპორტისა და კერძო სექტორის ინვესტიციების ხელშეწყობის მხარდაჭერას.
„შესაძლოა, განიხილებოდეს 2027 წლის შემდგომი ფინანსური მხარდაჭერის შესაძლო გზები ქვეყნის რეფორმების დღის წესრიგის შემდგომი მხარდაჭერისა და ევროკავშირთან უფრო მჭიდრო ჰარმონიზაციის მიზნით. „გლობალური კარიბჭის“ სტრატეგიის ფარგლებში, ევროკავშირის ინვესტიციები სომხეთში, სავარაუდოდ, 2.5 მილიარდ ევროს მიაღწევს. სომხეთი და ევროკავშირი ვალდებულნი არიან ხელი შეუწყონ ინკლუზიურ ზრდას და გაძლიერებულ კავშირს ურთიერთსასარგებლო თანამშრომლობაზე დაყრდნობით“, - აღნიშნულია განცხადებაში.
განცხადების თანახმად, მხარეები მიესალმებიან ვიზა-ლიბერალიზაციის შესახებ დიალოგის მნიშვნელოვან პროგრესს.
„მივესალმებით 2024 წელს დაწყებული ვიზა-ლიბერალიზაციის დიალოგის მნიშვნელოვან პროგრესს, რომელიც, სავარაუდოდ, გააუმჯობესებს მობილურობას, ხელს შეუწყობს ხალხთა შორის უფრო მჭიდრო კონტაქტებს და გააძლიერებს ეკონომიკურ კავშირებს ევროკავშირსა და სომხეთს შორის. ხაზს ვუსვამთ ვიზა ლიბერალიზაციის სამოქმედო გეგმისა და მისი კრიტერიუმების ეფექტური განხორციელების მნიშვნელობას და მივესალმებით ევროკავშირსა და სომხეთს შორის ვიზების გამარტივებისა და რეადმისიის შეთანხმებების ეფექტურ განხორციელებას“, - აღნიშნულია განცხადებაში.
