ესტონეთის საგარეო საქმეთა სამინისტრომ რუსეთის საელჩოს წარმომადგენელი ესტონეთში მცხოვრები პირებისთვის პენსიების გადაუხდელობის გამო დაიბარა, დიპლომატიური ნოტა გადასცა და ახსნა-განმარტება და საკითხის მოგვარება მოითხოვა.
„2025 წლის პირველ კვარტალში რუსეთმა არ შეასრულა საპენსიო დაზღვევის სფეროში თანამშრომლობის შესახებ შეთანხმებით გათვალისწინებული ვალდებულებები, რომელიც 2012 წლიდან მოქმედებს“, - ნათქვამია ესტონეთის საგარეო საქმეთა სამინისტროს მიერ გავრცელებულ პრესრელიზში.
„თითქმის 4 000 ადამიანს, რომლებიც ესტონეთში ცხოვრობენ და პენსიას რუსეთიდან იღებენ, თანხა არ მიუღია“, - აღნიშნულია პრესრელიზში.
ესტონეთის საგარეო საქმეთა სამინისტროში რუსეთის წარმომადგენელს განუმარტეს, რომ ესტონეთი ბანკებში გადარიცხვის ოპერაციებს არ დაბლოკავს.
სოციალური დაზღვევის საბჭოს (SKA) ინფორმაციით, დაახლოებით 200 პენსიონერი მხოლოდ რუსულ პენსიას იღებს, უმრავლესობა კი ფულს როგორც ესტონეთიდან, ისე რუსეთიდან ღებულობს.
SKA-ს განცხადებით, მიუხედავად იმისა, რომ რუსეთის საპენსიო სამსახურმა დაადასტურა საპენსიო თანხების 28 თებერვალს მიღება, 3 აპრილის მდგომარეობით, ეს თანხა მას პენსიონერებისთვის არ გადაუხდია.
„ესტონეთში მცხოვრებ რუს პენსიონერებს, რომლებზეც გადახდების დაგვიანება სერიოზულად აისახა, საჭიროების შემთხვევაში, შეუძლიათ მიმართონ ადგილობრივ მთავრობას საარსებო შემწეობის მისაღებად“, - აცხადებს ესტონეთის სოციალური დაზღვევის საბჭო.
ბოლო წლებში გადახდების დაგვიანების რამდენიმე შემთხვევა დაფიქსირდა.
წელიწადში ოთხჯერ, სოციალური დაზღვევის საბჭო რუსეთის საპენსიო და სოციალური დაზღვევის ფონდში რიცხავს თანხას, რათა რუსეთში მცხოვრებმა ესტონელებმა პენსია მიიღონ.
2024 წლის პირველი კვარტლის მონაცემებით, SKA-მ რუსეთში 5 000 თანამემამულეს გადაუხადა პენსია, რომლის ჯამურმა ოდენობამ 4.1 მილიონ ევროზე მეტი შეადგინა.
იმავე პერიოდში რუსულმა ფონდმა ესტონეთში გადმორიცხა 700 ათას ევროზე მეტი, რომელიც 5 000 პენსიონერზე გადანაწილდა.
SKA რუსეთში განსაკუთრებულ გადახდებს SEB ბანკის მეშვეობით ახორციელებს, ჩვეულებრივ პირობებში კი საბანკო ოპერაციები არ ხორციელდება.
საპენსიო გადახდები დამოკიდებულია არა მოქალაქეობაზე, არამედ სხვა ქვეყანაში მუშაობის წლების რაოდენობაზე.
წყარო: 1tv.ge
