2025 წლის ოქტომბერში, Tesla-სა და SpaceX-ის აღმასრულებელი დირექტორი, ილონ მასკი მსოფლიოში პირველი ადამიანი გახდა, რომლის ქონებამაც $500-მილიარდიან ნიშნულს მიაღწია. გასული კვირის დასაწყისში მსოფლიოს უმდიდრესი ადამიანის ქონებამ $600-მილიარდიანი ნიშნული გადახალა, კვირის დასასრულს კი $700 მილიარდს გადააჭარბა. ბოლო ერთ კვირაში მასკის ქონების მკვეთრი ზრდა უმეტესაც მის დაარსებულ ავიაკოსმოსურ კომპანია SpaceX-ს და დელავერის სასამართლოს მიერ Tesla-ს აქციების გაუქმებული ოფციონების აღდგენას უკავშირდებოდა.
შედეგად, 2025 წლის 22 დეკემბრის მონაცემებით, ამერიკული Forbes-ი ილონ მასკის ქონებას $754 მილიარდად აფასებს. და ეს მაშინ, როდესაც მსოფლიოს უმდიდრესმა ადამიანმა წელი $421 მილიარდის სიმდიდრით დაიწყო. მხოლოდ მიმდინარე წელს მასკის ქონება $333 მილიარდზე მეტით, შესაბამისად, დღეში საშუალოდ $935 მილიონით გაიზარდა. ეს გაცილებით მეტია, ვიდრე მსოფლიოში ნებისმიერი სხვა მილიარდერის ქონება – მაგალითად, მეორე უმდიდრესი ადამიანი, ლარი პეიჯი, $255 მილიარდს ფლობს.
თუმცა მასკთან ერთად, უკანასკნელი 12 თვე მოგებიანი აღმოჩნდა სხვა მილიარდერებისთვისაც. Forbes-ის მონაცემებით, საერთო ჯამში პლანეტის 3,100-ზე მეტი მილიარდერი იანვრის დასაწყისიდან $3.6 ტრილიონით გამდიდრდა, რაც მათ კოლექტიურ სიმდიდრეს $18.7 ტრილიონამდე ზრდის.
მიმდინარე წელს ყველაზე დიდი მოგების მქონე ათი ადამიანის სიმდიდრე $729 მილიარდზე მეტით გაიზარდა. მათგან უმრავლესობა, ექვსი პირი, ამერიკის შეერთებული შტატებიდანაა. სიმდიდრის მატება კი ძირითადად ხელოვნურ ინტელექტში მკვეთრად გაზრდილ ინვესტიციებზე მოდიოდა, მათ შორის Oracle-ის დამფუძნებლის, ლარი ელისონის, Nvidia-ს პრეზიდენტისა და აღმასრულებელი დირექტორის, Jენსენ ჰუანგისა და Google-ის ლარი პეიჯისა და სერგეი ბრინის შემთხვევაში.
AI-ზე გაზრდილ მოთხოვნას უკავშირდება SoftBank-ის დამფუძნებლის, მასაიოში სონის ქონების ზრდაც. კომპანიამ 2025 წელს ხელოვნურ ინტელექტსა და ნახევარგამტარებში ინვესტიციები გააორმაგა, მათ შორის $6.5 მილიარდად ნახევარგამტარების ამერიკული მწარმოებელი Ampere Computing Holdings-ი შეიძინა, ხოლო Nvidia-მ $5.8 მილიარდის ღირებულების აქციები გაყიდა.
ათეულში მეექვსეა Inditex-ის დამფუძნებელი, ესპანელი მილიარდერი ამანსიო ორტეგა, რომელმაც მიმდინარე წელს კომპანიაში 60%-იანი წილის წყალობით მხოლოდ დივიდენდის სახით $3 მილიარდი მიიღო. Inditex-მა პირველ სამ კვარტალში რეკორდული $5.4 მილიარდის წმინდა მოგებაც დააფიქსირა, რაც წლიურად 3.9%-იანი ზრდაა.
ათეულში ასევე მოხვდა მექსიკის სპილენძის მომპოვებელი უმსხვილესი კომპანია Grupo México-ს აღმასრულებელი დირექტორი, ხერმან ლარეა მოტა-ველასკო. ბოლო 12 თვეში, მაღალი მოთხოვნის გავლენით, ტარიფებთან დაკავშირებული შეშფოთებების გათვალისწინებით და სწორი დივერსიფიკაციით, კომპანიის აქციების ღირებულება 100%-ით გაიზარდა.
ათეულში კიდევ ერთი მექსიკელი, ლათინურ ამერიკაში მობილური კომუნიკაციების უმსხვილესი კომპანია América Móvil-ის დამფუძნებელი კარლოს სლიმ ელუა. კონგლომერატს მიმდინარე წელს 3 მილიონზე მეტი აბონენტი დაემატა, ხოლო შემოსავალი პირველ ცხრა თვეში 10.5%-ით გაიზარდა.
