რეკლამა ყველგან დაგვდევს – ტელევიზორში, ტელეფონში, მატარებელსა თუ ესკალატორზე. ახლა კი ის ჩვენს ჩატბოტებშიც შეაღწევს. გასულ კვირას OpenAI-მ დააანონსა, რომ ChatGPT-ში რეკლამების გაყიდვას იწყებს. ეს ნაბიჯი კომპანიისთვის შემოსავლის პოტენციურად უზარმაზარ წყაროს ხსნის, Google-ის სარეკლამო იმპერიისთვის კი სერიოზულ საფრთხეს წარმოადგენს.
წლების განმავლობაში, OpenAI თავს არიდებდა რეკლამას და ჩატბოტს მეტწილად ღიად ტოვებდა. ეს სტრატეგია გამართლდა – უფასო, მაგრამ ძვირფასი პროდუქტი უზომოდ პოპულარული გახდა და დღეს, მას თვეში 900 მილიონი მომხმარებელი ჰყავს. თუმცა, მათი 95% უფასო ან დაბალბიუჯეტურ პაკეტებს იყენებს. კაცობრიობის მეათედისთვის უახლესი ტექნოლოგიის მიწოდება იაფი არ არის – კომპანია ვარაუდობს, რომ უახლოეს წლებში 115 მილიარდი დოლარის დახარჯვა მოუწევს.
ასეთი თანხების მოსაზიდად აუცილებელია უფასო მომხმარებლების მონეტიზაცია, რისთვისაც რეკლამა ტრადიციულად საუკეთესო გზაა. როგორც კომპანიაში განმარტავენ, რეკლამები ორგანული პასუხების ქვემოთ გამოჩნდება და მკაფიოდ იქნება მონიშნული. რაც მთავარია, კომერციული პარტნიორობა პასუხების შინაარსზე გავლენას არ მოახდენს – თუ ტოსტერს ეძებთ, ბოტი კონკრეტულ ბრენდს მხოლოდ იმიტომ არ გირჩევთ, რომ მან ფული გადაიხადა. თუმცა, თუ აღმოჩნდება, რომ თქვენი ძველი ტოსტერი აღარ ვარგა, ChatGPT-მა შესაძლოა ახლის შესაძენად რეკლამა შემოგთავაზოთ.
კონტექსტური რეკლამის ჩვენება ახალი არ არის – ეს Google-ის ბიზნესმოდელია, რომელსაც მისთვის მილიარდობით შემოსავალი მოაქვს. განსხვავება ისაა, თუ როგორ შეუძლია OpenAI-ს ამ რეკლამების თარგეთირება. Google მონაცემთა დიდი ბაზების დამუშავებას ეყრდნობა. ზოგჯერ განზრახვა ცხადია – თუ „არუბას ავიაბილეთებს“ ეძებთ, სავარაუდოდ, მოგზაურობას გეგმავთ. მაგრამ ძიებების დიდი ნაწილი ბუნდოვანია ან მხოლოდ კონკრეტულ საიტზე გადასვლას ემსახურება.
ამის საპირისპიროდ, ChatGPT-თან ინტერაქცია გაცილებით ხანგრძლივია – საშუალო სესია 12 წუთსა და 24 წამს გრძელდება. ეს დრო საკმარისია დიდი მოცულობის ინფორმაციის გასაცვლელად, რაც ბოტს მომხმარებლის სურვილების ზუსტ სურათს უქმნის. წარმოიდგინეთ სიტუაცია, როცა მომხმარებელი ბოტს დეტალურად ესაუბრება საფოსტო ყუთის დასამზადებლად საჭირო მასალებზე – მაგალითად, ხის დამუშავების ტექნიკასა და ლაზერული ჭრის ნიუანსებზე.
ხანგრძლივი საუბრის შემდეგ, ბოტმა ზუსტად იცის პროექტის დეტალები. თუ ამას „მეხსიერების“ ფუნქციასაც დავუმატებთ, ChatGPT-მ შეიძლება იცოდეს მომხმარებლის ლაზერული საჭრელის მოდელი და საცხოვრებელი ადგილიც კი. შედეგად, მას შეუძლია შესთავაზოს არა უბრალოდ „ხის მასალა“, არამედ კონკრეტული ტიპის ხე, რომელიც ამ კონკრეტულ კლიმატს უძლებს და ამ კონკრეტულ დანადგარზე მუშავდება.
მომხმარებლის საჭიროებების ასეთი ღრმა ცოდნა OpenAI-ს საშუალებას აძლევს, რეკლამა უფრო ძვირად გაყიდოს. მართალია, Google-ის მასშტაბები ჯერ კიდევ შეუდარებელია – დღეში 8.5 მილიარდი მოთხოვნითა და 2.5 მილიარდი აქტიური მომხმარებლით – მაგრამ OpenAI აგრესიულად იზრდება. მთავარი უპირატესობა ჩართულობის დროა: 12 წუთი ChatGPT-ში, Google-ის 5 წამის საპირისპიროდ.
დიდი აუდიტორიის, ხანგრძლივი ინტერაქციისა და ღრმა კონტექსტური მონაცემების კომბინაცია ქმნის ინსტრუმენტს, რომელსაც შეუძლია Google-ის მოწინავე პოზიციას სერიოზული საფრთხე შეუქმნას. სარეკლამო სამყაროში ახალი მოთამაშის სწრაფი აღზევების პრეცედენტები არსებობს. მაგალითად, Amazon-ის სარეკლამო შემოსავალი 2019 წელს მხოლოდ 12 მილიარდი იყო, 2024-ში კი 56 მილიარდს გადააჭარბა.
OpenAI-ს განცხადება Google-ისთვის გამაფრთხილებელი გასროლაა. კომპანია ამბობს, რომ სარეკლამო პროგრამა ჯერ სატესტო რეჟიმშია, თუმცა ერთ დროს ChatGPT-ც მხოლოდ ექსპერიმენტი იყო. იმ პროდუქტმა ციფრული სამყარო შეცვალა; მისმა სარეკლამო მოდელმა კი, შესაძლოა, იგივე გააკეთოს მონეტიზაციის სფეროში.
წყარო: Fastcompany
