სუროგატი დედები, რომელთა ნაწილი ორსულადაა, ნაწილმა კი ბავშვი უკვე გააჩინა, შველას ითხოვს. შუამავალმა კომპანიამ ქალები დიდუბის ავტოვაგზლის ჰოსტელში მიატოვა და კონტრაქტის პირობების შესრულებაზე უარს ამბობს.
სააგენტო "ქინდერლი ჯორჯია", რომელიც საქართველოში, დაახლოებით, სამი წელია ფუნქციონირებს, ათობით ქალი მოატყუა, ქალებს შვილები გააჩენინა, ჩვილები წაიყვანა მათ კი ფული არავინ გადაუხა. მითვისებულია ასი ათასობით ლარი.
თბილისის ჰოსტელში გამოკეტილი ქალები დუმილს არღვევენ. დღეს მთელი დღის განმავლობაში ქალაქის მთავარ სამმართველოში გამოკითხვების სერია მიმდინარეობს. დაზარალებულები ამბობენ, რომ მათ დაპირებული თანხის მცირე ნაწილი ჩაურიცხეს, ბოლოს კი უთხრეს, რომ კომპანია გაკოტრდა და ყველა გაუჩინარდა.
ჰოსტელში მიტოვებულ სუროგატ დედებს "რადიო თავისუფლებამ" მიაგნო. სუროგატი დედების ნაამბობით ირკვევა, რომ საკეისრო კვეთიდან ორ კვირაში ერთ-ერთ ქალს საშვილოსნოც კი ამოკვეთეს. სუროგატი დედები დახმარებას ითხოვენ, იურისტებთან ზარები არ წყდება. მოტყუებული ქალები დახმარებას უშედეგოდ ელოდებიან.
