ბათუმის მუნიციპალური ინსპექციის ინფორმაციით, ტურისტულ სეზონთან დაკავშირებით სასტუმროებისა და საცურაო აუზების გეგმიური სანიტარულ-ჰიგიენური მონიტორინგი დაიწყო.
უწყების ცნობით, შემოწმების ფარგლებში კონტროლი ხორციელდება საცურაო აუზების, გასახდელებისა და სველი წერტილების ჰიგიენურ მდგომარეობაზე.
ამასთან, მონიტორინგი მოიცავს კვების ბლოკებისა და სასტუმროს ნომრების სანიტარულ-ჰიგიენური ნორმების დაცვასაც.
ბათუმის მუნიციპალურ ინსპექციაში აცხადებენ, რომ სანიტარული შემოწმება ლაბორატორიასთან თანამშრომლობით ტარდება და მისი მიზანი ტურისტული სეზონის პერიოდში უსაფრთხო და ჯანსაღი გარემოს უზრუნველყოფაა.
