„მიწის ნაკვეთი ამოწურვადი რესურსია. შესაბამისად, რაც ცოტა დარჩება, მით მეტი იქნება მოთხოვნა და ეს ფასებს ავტომატურად კიდევ უფრო სწრაფად გაზრდის“, - ამის შესახებ „ბიზნესპრესნიუსს“ Brokeri.ge-ის დამფუძნებელმა ილია ინაშვილმა განუცხადა.
მისივე თქმით, დედაქალაქსა და მის შემოგარენში მიწის ნაკვეთებზე ფასები ყოველწლიურად თითქმის 20%-ით იზრდება.
„თბილისში მოთხოვნა ყოველთვის იყო და იქნება სამოსახლო ნაკვეთებზე. თბილისში ფაქტობრივად, აღარ არის ასაშენებელი ადგილ, ეგ შეუიარაღებელი თვალითაც კარგად ჩანს. თუ სადმე არის დარჩენილი ცარიელი ტერიტორია, ძალიან მაღალი ფასი აქვს და ადვილად იყიდება კიდეც. თბილისში მიწის ნაკვეთი გახდა ძალიან ლიკვიდური და ძალიან ძვირადღირებული. თუმცა, ფასის მიუხედავად, მოთხოვნა მაინც ყოველთვის პიკშია და იქნება კიდეც.
მოდით ავიღოთ თბილისის გარშემო ტერიტორიები, როგორიც არის ლისის ტბა, წავკისი, შინდისი, ოქროყანა, ივერთუბანი, თბილისის ზღვის მიმდებარე ტერიტორია, საგურამო... ასეთ ტერიტორიებზე მოთხოვნა არის მზარდი. წლიდან წლამდე იზრდება, მიუხედავად იმისა, რომ წლიდან წლამდე რჩება უფრო ნაკლები ცარიელი მიწის ნაკვეთი გასაყიდი. საგურამოს რომ შეხედოთ და ბოლო 5 წლის ჭრილში განვიხილოთ, როგორ ვითარდებოდა, საოცარია ტემპი.
გარეუბნებში, გააჩნია ლოკაციას, 10-დან 20%-მდე იზრდება ყოველწლიურად ფასები. თბილისსა და მის შემოგარენში ერთი კვადრატული სამოსახლო მიწის ნაკვეთის ფასი ამ ეტაპზე 100 დოლარიდან 600 დოლარამდე მერყეობს. რა თქმა უნდა, ღირებულება ძალიან ბევრ ფაქტორზეა დამოკიდებული. ძირითადი ფაქტორი არის ლოკაცია და კომუნიკაციები. მერე არის ხედები, გეოლოგია მიწის ნაკვეთის და ა.შ. სამწუხაროდ, გეოლოგიას არ ანიჭებენ დიდ მნიშვნელობას, არადა ამას უნდა აკვირდებოდეს პირველ რიგში ადამიანი. სამწუხაროა, რომ ეს მეორეხარისხოვანი თემაა.
რაც შეეხება საკორპუსე მიწის ნაკვეთებს, ცარიელ ადგილს თითქმის ვერ ნახავთ თბილისში. თუ ნახავთ, ფასი იწყება 400 დოლარიდან და ადის 3000-4000 აშშ დოლარამდე კადრატულ მეტრზე. ოღონდ, სანთლით საძებნელია ასეთი ტერიტორიები.
2025 წელი იყო სტაბილური, ნორმალური წელი. ვერ გეტყვით, რომ განსაკუთრებული წელი იყო, როდესაც მიწის ნაკვეთებზე ვსაუბრობთ. თუმცა, მოლოდინები მაქვს უკეთესი. 2026 წელი, სავარაუდოდ, უფრო კარგი იქნება. ჩემი აზრით, ძალიან მაღალი ზრდის მაჩვენებელი შეიძლება დაფიქსირდეს მომდევნო წელს ლისის ტბაზე და თბილისის ზღვაზე. ამ ორ ლოკაციაზე სწრაფად გაიზრდება ფასები იმიტომ, რომ ჩამორჩება ღირებულებებით ამ ეტაპზე დანარჩენ ტერიტორიებს. თანაც, უფრო მეტია თავისუფალი ადგილი. დაბალი განაშენიანების ზონაა და სამოსახლო მიწის ნაკვეთებად გაიყიდება ძირითადად.
თუ მივაქცევთ ყურადღებას ზრდის პროცენტულ მაჩვენებელს მიწის ნაკვეთებზე, რომელიც მე დავასახელე, უნდა გამოვიტანოთ დასკვნა, რა ეღირება მიწის ნაკვეთები 5 წელიწადში. თუ ვამბობთ, რომ გვაქვს 10-20% ყოველწლიური ზრდის მაჩვენებელი, უნდა ვიცოდეთ, რომ კი არ შემცირდება, არამედ გაიზრდება ფასი, რაც დრო გავა. იმიტომ, რომ მიწის ნაკვეთები არის ამოწურვადი რესურსი. შესაბამისად, რაც ცოტა დარჩება, მით მეტი იქნება მოთხოვნა და ეს ავტომატურად კიდევ უფრო სწრაფად გაზრდის ფასებსაც.
მარტივ მაგალითს გეტყვით, ავიღოთ ლისის ტბა, სადაც ჯერ კიდევ არის შესაძლებელი, რომ სამოსახლო მიწის ნაკვეთი იყიდოთ დაახლოებით 150 დოლარად. თუ ყოველწლიურად ლისის ტბაზე 10-20%-ით უნდა გაიზარდოს ფასები, გამოდის, რომ 5 წელიწადში უნდა აგვქონდეს ფასი 250 დოლარი. ანუ 1000 კვადრატულ მიწის ნაკვეთზე 5 წელიწადში მოუწევს მოსახლეს 250 000 დოლარის გადახდა ამ ლოკაციაზე. ანუ 5 წელიწადში მიწის ნაკვეთში შესაძლოა, 100 000 დოლარით მეტის გადახდა იყოს საჭირო. ხომ არავის ეპარება ეჭვი, რომ ბაზარზე სიტუაცია სწორედ ამ ტენდენციით წავა“, - განაცხადა ილია ინაშვილმა.
