საავიაციო ფორუმ Routes Europe 2026-ის ფარგლებში საქართველოს აეროპორტების გაერთიანების გაერთიანება მეორე დღეა პარტნიორ ავიაკომპანიებთან, აეროპორტებთან და საკონსულტაციო კომპანიებთან აქტიურ შეხვედრებს მართავს. აეროპორტების გაერთიანების გენერალური დირექტორის ლევან მოსეშვილის განცხადებით, საქართველოსთვის პრიორიტეტი ახალი ავიამიმართულებების დამატება და არსებულ რეისებზე სიხშირეების ზრდაა.
მისი თქმით, იტალიის ქალაქ რიმინიში მიმდინარე ფორუმზე ქართული დელეგაცია პარტნიორ და პოტენციურ ავიაკომპანიებთან აქტიურ მოლაპარაკებებს აწარმოებს, რათა ქვეყნის საავიაციო ბაზარი კიდევ უფრო გაფართოვდეს. ლევან მოსეშვილის განცხადებით საქართველოსთვის პრიორიტეტი ახალი ავიამიმართულებების დამატება და არსებული რეისების სიხშირეების ზრდაა.
,,მეორე დღეა წარმატებით მიმდინარეობს მსოფლიოს საავიაციო ინდუსტრიის ერთ-ერთი ყველაზე მნიშვნელოვანი ფორუმი - Routes Europe 2026. საქართველოს აეროპორტების გაერთიანებას სამი დღის განმავლობაში დაგეგმილი აქვს შეხვედრები როგორც ბაზარზე მოქმედ, ისე პოტენციურ ახალ ავიაკომპანიებთან და აეროპორტებთან. ჩვენი მიზანია, საქართველო კიდევ უფრო გავაძლიეროთ როგორც საავიაციო მიმოსვლის, ისე ტურიზმის მიმართულებით და ამით ხელი შევუწყოთ ქვეყნის ეკონომიკის განვითარებას.
შეხვედრები გავმართეთ ევროპულ, აზიურ და ამერიკულ ავიაკომპანიებთან, რათა უახლოეს მომავალში საქართველოს ავიაბაზარზე ახალი ავიაკომპანიები და მიმართულებები ვიხილოთ.
მსგავს ფორუმებში მონაწილეობა შესაძლებლობას გვაძლევს, დავამყაროთ ახალი კონტაქტები ავიაკომპანიებსა და აეროპორტებთან, რაც სამომავლოდ ჩვენი საავიაციო სექტორის კიდევ უფრო გაძლიერებას შეუწყობს ხელს,“- განაცხადა ლევან მოსეშვილმა.
ფორუმის პირველ ორ დღეში საქართველოს აეროპორტების გაერთიანების გუნდმა 30-ზე მეტი საქმიანი შეხვედრა გამართა ისეთ ავიაკომპანიებთან, როგორებიცაა United Airlines, British airways, Brussels Airlines, Finnair, easyJet, Volotea, Condor, Vueling, , Wizz Air, Air Serbia და აშ. სამდღიანი ფორუმის ფარგლებში ჯამში 45-მდე შეხვედრაა დაგეგმილი, რაც საქართველოს ავიაბაზრის განვითარებისა და ქვეყნის ტურისტული პოტენციალის საერთაშორისო პარტნიორებისთვის გაცნობის შესაძლებლობას ქმნის.ფორუმზე საქართველოს აეროპორტების გაერთიანება და TAV Georgia ერთობლივი სტენდით არიან წარმოდგენილი.
ინფორმაციას აეროპორტების გაერთიანება ავრცელებს
