თბილისში „იგლ ჰილს საქართველო”-ს ოფისისა და საპრეზენტაციო სივრცის ინაუგურაციის ცერემონია გაიმართა, რომელსაც პრემიერ-მინისტრ ირაკლი კობახიძესთან და ეკონომიკისა და მდგრადი განვითარების მინისტრ მარიამ ქვრივიშვილთან ერთად, „იგლ ჰილსი“-ს დამფუძნებელი - მოჰამედ ალი ალაბარი დაესწრო.
ღონისძიებაზე იმყოფებოდა სააგენტოს „აწარმოე საქართველოში“ დირექტორი მიხეილ ხიდურელი. მისი თქმით, „იგლ ჰილს“-თან მოლაპარაკებების წარმატებით დასრულება საქართველოს ეკონომიკისა და მდგრადი განვითარების სამინისტროსა და სააგენტოს „აწარმოე საქართველოში“ მრავალთვიანი სამუშაო პროცესის შედეგია.
„დღეს საქართველოს ისტორიაში ყველაზე დიდი ინვესტიციის განხორციელება ახალ ეტაპზე გადავიდა. პატივი გვქონდა გვემასპინძლა საინვესტიციო მიმართულებით უმსხვილესი „ემაარ ჯგუფი“-ს დამფუძნებლისა და მმართველი დირექტორისთვის - მოჰამედ ალი ალაბარისთვის. ასევე, დღეს უკვე ოფიციალურად გაიხსნა დეველოპერული კომპანია „იგლ ჰილს“-ის საპრეზენტაციო სივრცე . პროექტი, მისი მასშტაბიდან გამომდინარე, უპრეცედენტოა ქვეყნისათვის და მნიშვნელოვან წვლილს შეიტანს განვითარებასა და ახალ სამუშაო ადგილების შექმნაში. ამასთან, ეს პროცესი ხელს შეუწყობს ქვეყნის საინვესტიციო და ბიზნეს გარემოს შესახებ ცნობადობის გაზრდას საერთაშორისო მასშტაბით“ - აღნიშნა მიხეილ ხიდურელმა.
6,5 მლრდ აშშ დოლარის მოცულობის უმსხვილესი ინვესტიცია თბილისში, კრწანისის რაიონში და ბათუმის სიახლოვეს, გონიოს ტერიტორიაზე 2 დეველოპერული საინვესტიციო პროექტის განვითარებას გულისხმობს. პროექტების ფარგლებში, თბილისსა და ბათუმის მიმდებარედ განვითარდება თანამედროვე, მრავალფეროვანი ინფრასტრუქტურა. ასევე, ბათუმში აშენდება იახტების ნავმისადგომიც, რაც საზღვაო ქალაქს სრულიად ახალ, თუმცა ბუნებრივ ეტაპზე გადაიყვანს.
ინფორმაციას ავრცელებს სააგენტო „აწარმოე საქართველოში“
