სრული პასუხისმგებლობით შემიძლია გითხრათ, რომ ჩვენს ქვეყანას ნავთოპროდუქტების ბაზარზე დეფიციტი, შიმშილი არ ემუქრება - ამ განცხადებას, საწვავის ქართული ბაზრის შეფასებისას, ნავთობიმპორტიორთა კავშირის თავმჯდომარე ვახტანგ იობაშვილი BMG-სთან აკეთებს.
გაერთიანების ხელმძღვანელი მომდევნო პერიოდში საწვავის გაძვირებას პროგნოზირებს, თუმცა რამდენით და როდის შეიძლება გაიზარდოს ფასები ამას ვერ აკონკრეტებს და ამბობს, რომ ამას ნავთობის მსოფლიო ბაზარზე არსებული ვითარება განსაზღვრავს.
„საწვავის ახალი პარტიების შესყიდვები დავიწყეთ და პირობას გაძლევთ, რომ მხოლოდ და მხოლოდ ვეძებთ, სადაც იაფად ვნახავთ - იმ ქვეყნებში, რომლებიც ახლო აღმოსავლეთთან ახლოს არ არიან.
სრული პასუხისმგებლობით შემიძლია გითხრათ, რომ ჩვენს ქვეყანას ნავთოპროდუქტების ბაზარზე დეფიციტი, შიმშილი არ ემუქრება, მხოლოდ უნდა გავითავისოთ, რომ იქნება ფასების ცვალებადობა, იქნება არითმიები, ეს ყოველთვის იყო“, - ამბობს ვახტანგ იობაშვილი და დასძენს: „ვნახოთ, რას მოუტანს მსოფლიო სანავთობო ბაზარს აღნიშნული სიტუაციები. ფაქტი ერთია, მსოფლიო სანავთობო ბაზრებს ნედლი ნავთობი მიწოდება მოაკლდა. ანუ გადამმუშავებელ სექტორებში დეფიციტი შეიქმნა. დეფიციტი კი ფასების ზრდას განაპირობებს. ამას კი მხოლოდ ჩვენ კი არა, მთელი მსოფლიო გრძნობს“.
ცნობისთვის, მსოფლიოში ნავთობის ფასების რეკორდული ზრდის ფონზე, საქართველოში საწვავი გაძვირდა. ქვეყანაში მოქმედ ე.წ. ბრენდირებულ გასამართ სადგურებზე ფასების კორექტირება 7 მარტიდან დაიწყო, რიგმა ქსელმა კი ღირებულება დღეს დააკორექტირა. ბოლო ცვლილების მიხედვით, რიგ სადგურზე ფასები 2-12 თეთრით არის გაძვირებული, ხოლო ზოგიერთ ქსელში დიზელის ფასის მატება 18 თეთრია. ამასთან, საქართველოში მოქმედ სადგურებზე ფასი უფრო მეტად დიზელის ტიპის საწვავზე გაიზარდა.
