საქართველოში პოლონეთის საელჩო პოლონელ ინვესტორებს ბათუმში ზოგიერთი დეველოპერის "არაკეთილსინდისიერ" ქცევაზე ცნობების შესახებ აფრთხილებს.
განცხადებაში აღნიშნულია, რომ საელჩოს მოტყუებული პოლონელი ინვესტორებისგან მზარდი რაოდენობის შეტყობინებები შესდის.
საელჩო პოლონეთის მოქალაქეებს მოუწოდებს, რომ უძრავ ქონებაში ინვესტიციასთან დაკავშირებით გადაწყვეტილების მიღებამდე კონკრეტული დეველოპერის სანდოობა საფუძვლიანად გამოიკვლიონ და ქვეყნის "პოლიტიკურ-ეკონომიკური სიტუაციის ფართო კონტექსტი" და ბათუმის ინფრასტრუქტურის განვითარების დონე გაითვალისწინონ.
საელჩო ხაზს უსვამს, რომ მოტყუებული ინვესტორების მხარდაჭერის საშუალებები შეზღუდულია და დაზარალებულებისთვის ერთადერთი გამოსავალი სასამართლოში სარჩელის შეტანაა, რაც "ხანგრძლივი პროცესია და საბოლოო წარმატებას აუცილებლად არ უზრუნველყოფს".
"მოტყუებული პოლონელი ინვესტორებისგან დაწესებულებაში შემომავალი მზარდი რაოდენობის ცნობების ფონზე, რომლებიც ბათუმში ზოგიერთი დეველოპერის მიერ არაკეთილსინდისიერი პრაქტიკების გამოყენებაზე მიუთითებს, გირჩევთ, უძრავ ქონებაში ინვესტიციასთან დაკავშირებით საქმიანი გადაწყვეტილების მიღებისას განსაკუთრებული სიფრთხილე გამოიჩინოთ. ყოველ ასეთ გადაწყვეტილებას წინ უნდა უძღოდეს მოცემული კონკრეტული დეველოპერის კომპეტენციისა და სანდოობის საფუძვლიანი ანალიზი, რომელიც მისი წინა პროექტების ისტორიას ითვალისწინებს. ასევე უნდა გაითვალისწინოთ საქართველოს პოლიტიკურ-ეკონომიკური სიტუაციის ფართო კონტექსტი და ქალაქ ბათუმის ინფრასტრუქტურის განვითარების დონე. არაკეთილსინდისიერი დეველოპერების მიერ დაზარალებულთა მხარდაჭერის საშუალებების შეზღუდულობის გათვალისწინებით, ერთადერთი გამოსავალია, რომ დაზარალებულებმა სასამართლოს თავად მიმართონ, რაც ხანგრძლივი პროცესია და საბოლოო წარმატებას აუცილებლად არ უზრუნველყოფს". - წერია საელჩოს განცხადებაში.
წყარო: tabula.ge
