თბილისში, კახეთის გზატკეცილზე მდებარე „ერთიანი ნაციონალური მოძრაობის“ ყოფილი ოფისის ადგილას მრავალფუნქციური შენობა, მათ შორის, ავტომობილების საგამოფენო დარბაზი აშენდება.
როგორც არქიტექტურის სამსახურის ვებგვერდიდან ირკვევა, 4000 კვ.მ. მიწის ფართობზე საავტომობილო ცენტრის და საოფისე სივრცეების მოწყობა დაახლოებით, 3 წელიწადში დასრულდება.
„ნაკვეთზე მდებარეობს 3 სართულიანი საოფისე შენობა. მესაკუთრის სურვილით დაგეგმილია არსებული შენობის რეკონსტრუქცია (მიშენება) და შენობის ფუნქციის ცვლილება მრავალფუნქციური კომპლექსით, სადაც მოეწყობა საავტომობილო ცენტრი/შოურუმი საოფისე სივრცეებით (კომერციული 65% და საოფისე 35% ფუნქციური გადანაწილებით). შენობა წარმოადგენს მონოლითური რკინაბეტონის ჩარჩოკავშირებიან სისტემას, დაფუძნება გადაწყვეტილია რკინაბეტონის ფილოვან საძირკველზე. მიშენების ნაწილი ასევე წარმოდგენილი იქნება სამი მიწისზედა და 1 მიწისქვეშა სართულით“, - წერია პროექტის განმარტებით ბარათში.
ცნობისთვის, ერთიანმა ნაციონალურმა მოძრაობამ კახეთის გზატკეცილზე მდებარე ოფისი გასული წლის მარტში გაყიდა. ტერიტორია შპს „ევ დისტრიბუშენმა“ შეიძინა, რომელიც 2024 წლის თებერვალში დაფუძნებული კომპანიაა. კომპანიის დირექტორის თანამდებობას ენმ-ის ერთ-ერთი ლიდერი დავით კირკიტაძე იკავებს, ხოლო მისი 100%-იანი წილის მფლობელია ბიზნესმენი თამაზ ცოფურაშვილი. აღნიშნული ოფისი პარტიამ 2012 წლის საპარლამენტო არჩევნებამდე გახსნა.
