გერმანული ავტომწარმოებელი Mercedes-Benz ქვეყანაში მდებარე საწარმოო ობიექტებში ყველა ახალ ინვესტიციას აჩერებს და ქარხნების შესაძლო დახურვას განიხილავს. გადაწყვეტილების მიზეზი გერმანიაში წარმოების მაღალი დანახარჯები და კომპანიის ხელმძღვანელობას, საწარმოთა საბჭოსა და პროფკავშირ IG Metall-ს შორის ხარჯების შემცირების საკითხზე შეთანხმების მიუღწევლობაა.
კომპანიის წარმოების მიმართულების ხელმძღვანელის, მიხაელ შიბეს განცხადებით, მენეჯმენტმა გერმანულ საწარმოო ობიექტებში შემდგომი ინვესტიციების შეჩერება ერთობლივად გადაწყვიტა. მისი განმარტებით, მიუხედავად ინტენსიური მოლაპარაკებებისა, მხარეები შეთანხმების მისაღწევ გზას ამ ეტაპზე ვერ ხედავენ. შიბეს თქმით, გერმანიაში წარმოების არსებული ხარჯების პირობებში ინვესტიციების განხორციელება ეკონომიკურად გაუმართლებელია.
ერთ-ერთი მთავარი პრობლემა შრომის მაღალი ღირებულებაა. შიბეს განცხადებით, გერმანიის საწარმოო ობიექტებში ერთი სამუშაო საათის ღირებულება ზოგიერთ შემთხვევაში აღმოსავლეთ ევროპის საწარმოებთან შედარებით ხუთჯერ მეტია. მსგავსი სხვაობაა ადმინისტრაციულ ხარჯებშიც. კომპანია თანამშრომლებისგან ხარჯების შემცირების მიზნით მეტ სამუშაო საათს იმავე ანაზღაურების სანაცვლოდ მოითხოვს. განსახილველ საკითხებს შორისაა დამატებითი ბონუსებისა და შვებულებისა და საშობაო დანამატების შემცირებაც.
