გერმანული ავტომწარმოებელი Volkswagen Group ჩინეთში ქარხანას პირველად ხურავს. წარმოება უკვე შეჩერებულია და სამრეწველო ობიექტი წლის მეორე ნახევარში დაიხურება. ამის შესახებ გამოცემა Handelsblatt-ი იტყობინება.
საუბარია Volkswagen-სა და ჩინურ მწარმოებელ SAIC-ს შორის ნანკინის ქალაქში ერთობლივ საწარმოზე. ქარხანა 2008 წელს გაიხსნა, წელიწადში მაქსიმალური წარმოების სიმძლავრით 360 000 ავტომობილი. ბოლო დროს ის შემცირებული სიმძლავრით მუშაობს და Passat-ისა და Skoda Superb-ის მოდელებს აწარმოებს.
ქარხნის დახურვის მიზეზად ლოგისტიკური სირთულეები სახელდება: ქარხანა ქალაქის ცენტრთან ახლოს მდებარე სამრეწველო ზონაში მდებარეობს, რაც მის რეკონსტრუქციას ართულებს. ამის გამო, ელექტრომობილების წარმოებისთვის ქარხნის განახლება ძვირი და არაეფექტური იქნებოდა, ამიტომ გადაწყდა ობიექტში წარმოების დახურვა. საწარმოს ტერიტორია და მისი შენობები ქალაქის ადმინისტრაციის საკუთრებაში დაბრუნდება, ხოლო წარმოება კომპანიის ქარხანაში მეზობელ იჟენში გადავა.
გერმანულმა კონცერნმა მსგავსი ნაბიჯი ადრე გადადგა შანხაის მახლობლად მდებარე საწარმოო ობიექტში 2022 წელს, თუმცა ქარხანა მაშინ სრულად არ დახურულა. გამოცემა აღნიშნავს, რომ ნანკინის ქარხნის დახურვა „ჩინეთის საავტომობილო ბაზარზე სტრუქტურულ ცვლილებებს განასახიერებს“.
ქვეყანაში შიდა წვის ძრავიან ავტომობილებზე მოთხოვნა მცირდება და ჩინური კომპანიების ელექტრომობილების წარმოების შესაძლებლობები იზრდება, რაც გერმანელ მწარმოებლებს მზარდი კონკურენტული ზეწოლის ქვეშ აყენებს. გასულ წელს Volkswagen-მა ჩინეთში 3 მილიონზე ნაკლები ავტომობილი გაყიდა, რაც კომპანიისთვის 2012 წლის შემდეგ ყველაზე დაბალი მაჩვენებელი იყო.
