ევროტურნირების ახალი სეზონის წინ UEFA-მ გაზარდა ყვითელი ბარათების რაოდენობა, რომლის შემდეგაც ფეხბურთელებს დისკვალიფიკაციის გამო მოუწევთ ერთი მატჩის გამოტოვება. ეს წესი იმოქმედებს ჩემპიონთა ლიგის, ევროპის ლიგისა და კონფერენციის ლიგის ძირითად ეტაპებზე.
ახალი წესის თანახმად, მომდევნო მატჩის გამოტოვება გათვალისწინებულია ოთხი ყვითელი ბარათის მიღების შემდეგ. მომდევნო დისკვალიფიკაციას ფეხბურთელი დაიმსახურებს ყოველი შემდეგი ლუწი ბარათის მიღების შემდეგ – მეექვსე, მერვე და ა.შ.
UEFA-მ ეს ცვლილება ევროთასების რეფორმით ახსნა, რომელიც 2024-25 წლების სეზონიდან შევიდა ძალაში. ჩემპიონთა ლიგისა და ევროპის ლიგის პირველ ეტაპზე მატჩების რაოდენობის ექვსიდან რვამდე გაზრდის გამო ძველი სისტემით (მატჩის გამოტოვება სამი ბარათის შემდეგ) უფრო ხშირად ხდებოდა ფეხბურთელების დისკვალიფიკაცია.
ახალი წესი იმოქმედებს კონფერენციის ლიგაზეც, სადაც ძირითად ეტაპზე ექვსი ტური ტარდება.
