ამერიკული ტარიფები იმიტომ წესდება, რომ პრეზიდენტ ტრამპს ტარიფები, უბრალოდ, უყვარს - ამის შესახებ ბრიტანული ანალიტიკურ ცენტრ ECIPE-ის საერთაშორისო ვაჭრობის ანალიტიკოსმა დევიდ ჰენიგმა BBC-ის განუცხადა.
ჰენიგი ტრამპის პირველი ვადის დროს აშშ-სთან სავაჭრო მოლაპარაკებებში ბრიტანეთს წარმოადგენდა.
მისი თქმით, „ტარიფებში არ არსებობს ეკონომიკური ლოგიკა.“ მართალია, მიზეზებად აშშ-ის მრეწველობის მხარდაჭერა, სავაჭრო დეფიციტის შემცირება და ბიუჯეტის შემოსავლების გაზრდა სახელდება, მაგრამ არცერთი მათგანი, ბრიტანელის ექსპერტის შეფასებით, „დამაჯერებელი არ არის.“
მისი თქმით, „ტრამპ 2“-ისთვის ტარიფები არც ისე ეკონომიკური „სამართლიანობის“ აღდგენისა და ხაზინის შევსების საშუალებაა, რამდენადაც ისინი მას საშუალებას აძლევს, ქვეყანაში საკუთარი ძალაუფლება გააძლიეროს. ეს გამოიხატება იმაში, რომ ტრამპი ამას საპრეზიდენტო ბრძანებებით, კონგრესის გვერდის ავლით აკეთებს მაშინ, როცა ამ ტარიფებს აშშ-ის ეკონომიკური და ფინანსური მდგომარეობისთვის ეპოქალური მნიშვნელობა აქვს. ტარიფები ტრამპს, ასევე, საერთაშორისო არენაზე ბერკეტებს ანიჭებს.
ტრამპს სურს, მოკავშირეები აიძულოს, თავდაცვაზე მეტი დახარჯონ. ის გრენლანდიისა და კანადის ტერიტორიების დათმობას ითხოვს და უკმაყოფილოა მსხვილი ამერიკული ბიზნესის ევროპული რეგულირებით, რომელსაც მისი მხარდამჭერები, ილონ მასკი და მარკ ცუკერბერგი წარმოადგენენ. ტრამპს სურს, აშშ-ში ამერიკული კომპანიების მოგების ცენტრი დააბრუნოს, რომლებიც არაამერიკულ შემოსავალზე გადასახადების გადახდას ოფშორულ ირლანდიაში ამჯობინებენ.
„დაიწყება აგრესიული მოლაპარაკებები სავაჭრო ბარიერების მოხსნის თაობაზე მსოფლიოს ყველა ქვეყანასთან, რომ მათ მსოფლიოში ყველაზე მდიდარ ამერიკულ ბაზარზე წვდომა შეძლონ,“ - აცხადებს დევიდ ჰენიგი.
მისი შეფასებით, აშშ-ის სავაჭრო პარტნიორები იმედოვნებენ, რომ ტრამპი თითოეულ მათგანს შეუთანხმდება და, საბოლოოდ, რაც შეიძლება, „მცირე სავაჭრო სისხლი დაიღვრება.“ მეორე მხრივ, ტრამპმა უკვე დადო ასეთი გარიგებები, თუმცა ამას ხელი არ შეუშლია მისთვის, ახალი ტარიფების დაწესებით შეთანხმება დაერღვია.
„ტრამპს არასდროს სურდა გარიგებები. მას სურდა მხოლოდ ტარიფები,“ - აცხადებს ჰენიგი.
საავტომობილო საწვავის ფასების მონიტორინგის კომპანია Circle K-ის ხელმძღვანელი, ინდრეკ სასი აცხადებს, რომ ტრამპის არაპროგნოზირებადი სატარიფო პოლიტიკა მსხვილი ეკონომიკების სიჯანსაღეზე გლობალურ შეშფოთებას აძლიერებს, რაც, თავის მხრივ, ნავთობის ფასებზე ზეწოლას ახდენს.
კერძოდ, თუ მარტის დასაწყისში Brent-ის მარკის ნავთობი ბარელზე, დაახლოებით, 69 დოლარად იყიდებოდა, თვის ბოლო დღისთვის მისმა ფასმა ბარელზე, თითქმის, 75 დოლარს მიაღწია.
ექსპერტი ამბობს, რომ ტრამპის სატარიფო პოლიტიკა არა მხოლოდ გლობალურ ეკონომიკაზე ახდენს გავლენას, არამედ აშშ-ის შიდა ბაზრის მნიშვნელოვანი შეფერხება უკვე გამოიწვია, რაც ქვეყნის ეკონომიკას რეცესიის საფრთხეს უქმნის. ამას აშშ-ის ძირითადი ეკონომიკური მაჩვენებლები ადასტურებს, როგორიც არის სამომხმარებლო ნდობის კლება, საფონდო ბირჟების კორექტირება და ინფლაციის ყველაზე მაღალი დონე ბოლო 12 თვის განმავლობაში. მოდელ Atlantic FED GDPNow-ის პროგნოზით, პირველ კვარტალში აშშ-ის ეკონომიკა 2.8%-ით შემცირდება.
კომპანია Quantum Strategy-ის სტრატეგი, დევიდ როში CNBC-სთან ამბობს, რომ “ეს ტარიფები გარდამავალი არ არის, არამედ პრეზიდენტ ტრამპის რწმენის საგანია. ისინი გლობალიზაციიდან იზოლაციონისტურ და ნაციონალისტურ პოლიტიკაზე გადასვლას მოასწავებენ და არა მხოლოდ ეკონომიკაში.”
“ეს პროცესი რამდენიმე წელიწადს გაგრძელდება, თუმცა ათწლეულების განმავლობაში იქნება საგრძნობი,” - აცხადებს როში.
მისი თქმით, საზოგადოება ახლა უკვე მოლაპარაკებებს კი არა, შურისძიებას უნდა ელოდოს ევროკავშირის მხრიდან ამერიკული სერვისების მიმართ, ხოლო ჩინეთის საპასუხო რეაქცია აშშ-ის სტრატეგიულ და ბიზნესინტერესებზე იქნება ორიენტირებული. ექსპერტი პროგნოზირებს, რომ 2 აპრილის ტარიფები “დათვის ბაზარს,” ანუ აქციების გაყიდვებს გაამყარებს, რაც გლობალურ სტაგფლაციას, ასევე, აშშ-ისა და ევროკავშირის რეცესიას გამოიწვევს.
