რაც უფრო ადრე გაუჩნდება ბავშვს სმარტფონი, მით უფრო მაღალია მისთვის დეპრესიისა და სიმსუქნის რისკი – ამის შესახებ ნათქვამია კოლუმბიისა და კალიფორნიის უნივერსიტეტების მეცნიერების კვლევაში, რომელიც დაფუძნებულია ABCD პროექტის (2018–2020) 10 500 მონაწილის მონაცემებზე. სტატია გამოქვეყნებულია ჟურნალ Pediatrics–ში.
კვლევამ აჩვენა, რომ პერსონალური სმარტფონების მქონე ბავშვებს უფრო მეტად აქვთ ძილის პრობლემები, წონაში მატება და დეპრესიის სიმპტომების გამოვლენა. ამ სიმპტომების მქონე მონაწილეთა დაახლოებით 63%-ს ჰქონდა გაჯეტები. აშშ-ში სმარტფონის პირველად შეძენის საშუალო ასაკი 11 წელია.
ჯანმრთელობის მხრივ ნეგატიური ცვლილებები განსაკუთრებით შესამჩნევია მათ შორის, ვინც ტელეფონების გამოყენება 12 წლამდე დაიწყო. კვლევის შემდეგი ეტაპი მოიცავს სმარტფონების გავლენის ანალიზს იმ ბავშვების ჯანმრთელობაზე, რომლებმაც მათი გამოყენება 10 წლამდე დაიწყეს.
სპეციალისტები ასევე ხაზგასმით აღნიშნავენ, რომ სმარტფონები მოზარდებს აიძულებს, ნაკლები დრო დაუთმონ რეალურ ცხოვრებაში კომუნიკაციას, ფიზიკურ ვარჯიშსა და ძილს – ეს ყველაფერი კეთილდღეობისთვის მნიშვნელოვანია.
თუმცა, გაჯეტების სრულად გამორიცხვა შეუძლებელია, რადგან ისინი აუცილებელია სოციალური კავშირების შესანარჩუნებლად და სწავლისთვის. მშობლებს ურჩევენ, აკონტროლონ შვილების მიერ ეკრანებთან გატარებული დრო და მოწყობილობების გამოყენებას ყურადღებით და სიფრთხილით მიუდგნენ.
