კოლექტიურმა „ნაციონალურმა მოძრაობამ" და გიორგი ვაშაძემ საქართველოს მოსახლეობას რა უნდა უთხრას? - მცდელობა აქვთ, რომ საზოგადოება შეცდომაში შეიყვანონ, - ასე გამოეხმაურა თბილისის მერი „ნაციონალური მოძრაობის" განცხადებას, ევროკავშირის მიერ საქართველოსთვის 14 მილიარდი ევროს გადაცემის შესახებ.
მისივე განმარტებით, ჩვენი ქვეყნისთვის კანდიდატის სტატუსის მონიჭებამდეც ოპოზიციის მხრიდან მსგავსი დეზინფორმაცია ვრცელდებოდა.
„საქართველოსთვის 14 მილიარდის გადაცემა არის დიდი ბლეფი და სისულელე. კოლექტიურმა „ნაციონალურმა მოძრაობამ" და გიორგი ვაშაძემ საქართველოს მოსახლეობას რა უნდა უთხრას? მცდელობა აქვთ, რომ საზოგადოება შეცდომაში შეიყვანონ. გახსოვთ მათი კამპანია და განცხადებები, როდესაც ქვეყანამ კანდიდატის სტატუსი ვერ მიიღო, მიუხედავად იმისა, რომ ვიმსახურებდით მას. მაშინ ამბობდნენ, რომ ამ გადაწყვეტილების გამო, თურმე მილიარდობით გრანტი დავკარგეთ. დღეს ხომ გვაქვს კანდიდატის სტატუსი, სად არის მილიარდობით გრანტი? სანამ „გამჭვირვალობის კანონი“ მიიღებოდა ერთი თეთრი არ წამოსულა ამ მილიარდებიდან", - განაცხადა კახა კალაძემ.
შეგახსენებთ, გიორგი ვაშაძე პრემიერს საჯარო დებატებში იწვევს - თემა ევროკავშირის 14 მილიარდიანი დაფინანსებაა.
"ველოდები პასუხს თქვენგან, თუ მართალი ხართ არ უნდა შეგეშინდეთ საჯარო დებატების, ხოლო თუ ტყუით, ბოდიში მოუხადეთ საზოგადოებას, რომ თქვენ ბლოკავთ ამ თანხის მიღებას საქართველოსთვის, ისევე, როგორც დაბლოკეთ საქართველოს ევროინტეგრაციის პროცესი, - 14 მილიარდი საქართველოს ჩვენი ქვეყნის განვითარებისთვის“, - მიმართა გიორგი ვაშაძემ ირაკლი კობახიძეს.
