საბერძნეთში ევროკავშირის მიერ სოფლის მეურნეობის სუბსიდიების დაგვიანების გამო გამართულ საპროტესტო აქციაზე ფერმერებსა და პოლიციას შორის დაპირისპირება მოხდა. ამის შესახებ „როიტერი“ წერს.
საბერძნეთის სხვადასხვა ქალაქში ასობით ფერმერი ქუჩაში გამოვიდა და რამდენიმე რაიონში ტრაქტორებით გზები გადაკეტა. როგორც „როიტერი“ იუწყება, ქალაქ ნიკაიას მახლობლად პოლიციამ ფერმერების დასაშლელად ცრემლსადენი გაზი გამოიყენა.
პროტესტის მიზეზი ევროკავშირის სუბსიდიების გადახდის შეფერხება გახდა, რაც ქვეყანაში კორუფციული სკანდალის გამოძიებამ გამოიწვია. საქმე ეხება ევროკავშირის სოფლის მეურნეობის სუბსიდიების მისაღებად ფერმერების მიერ ინფორმაციის გაყალბებას მიწისა და პირუტყვის მფლობელობის შესახებ.
მედიის ცნობით, საქმეზე ამჟამად გამოძიება მიმდინარეობს.
