Nvidia-ს დირექტორთა საბჭო 12 ნოემბერს აღმასრულებელი დირექტორის, ჯენსენ ჰუანგის თანამდებობიდან შესაძლო გადაყენების საკითხზე მსჯელობს. ამის შესახებ Reuters-ი ინფორმირებულ წყაროზე დაყრდნობით წერს. გადაწყვეტილების მიღების პროცესს წინ უძღოდა კომპანიის ხელმძღვანელთან დაკავშირებული სკანდალი, რომელმაც Nvidia-ს კორპორაციული მართვის საკითხები და ხელმძღვანელობის ცვლილების შესაძლებლობა დღის წესრიგში დააყენა.
Reuters-ის ცნობით, ჰუანგის შესაძლო წასვლის შემთხვევაში კომპანიას ხელმძღვანელობის ვაკუუმის პრობლემა შეექმნება. Nvidia-ს თანადამფუძნებელს მემკვიდრე ოფიციალურად არასდროს დაუსახელებია. Bloomberg-ის ინფორმაციით, დირექტორთა საბჭო უკვე მუშაობდა გარე საკონსულტაციო კომპანიასთან შესაძლო შემცვლელების გამოსავლენად.
ანალიტიკოსები და ინვესტორები კომპანიის შიდა კანდიდატებს შორის განსაკუთრებით ორ ადამიანს გამოყოფენ. ერთ-ერთია ფინანსური დირექტორი კოლეტ კრესი, რომელიც ამ პოზიციას 2013 წლიდან იკავებს და შესაძლოა გარდამავალ პერიოდში აღმასრულებელი დირექტორის მოვალეობის შემსრულებლად დაინიშნოს. მეორე კანდიდატია იენ ბაკი, Nvidia-ს ტექნოლოგიური მიმართულების ერთ-ერთი წამყვანი ხელმძღვანელი, რომელიც კომპანიის CUDA პროგრამული პლატფორმის განვითარებაში მონაწილეობდა და მონაცემთა ცენტრებისთვის განკუთვნილ პროდუქტებს ხელმძღვანელობს.
საინვესტიციო კომპანია Futurum Equities-ის მთავარი საბაზრო სტრატეგის, შეი ბოლორის შეფასებით, ბაკი კომპანიის გრძელვადიანი ტექნოლოგიური განვითარების მიმართულებით ერთ-ერთი ყველაზე მნიშვნელოვანი შიდა კანდიდატია. ზოგიერთი ანალიტიკოსი კი შესაძლო გარდამავალ ეტაპზე კრესისა და ბაკის ერთობლივ ხელმძღვანელობასაც განიხილავს — ფინანსური სტაბილურობისა და ტექნოლოგიური განვითარების მიმართულებების გამიჯვნის გზით.
ჰუანგის შესაძლო წასვლის შესახებ ცნობების გავრცელების შემდეგ Nvidia-ს აქციები დამატებით ვაჭრობაში 8%-ზე მეტით დაეცა. Reuters-ის ინფორმაციით, კომპანიის საბაზრო ღირებულებას დაახლოებით 600 მილიარდი დოლარის დაკარგვის საფრთხე შეექმნა. Nvidia-ს დირექტორთა საბჭოს 11 წევრი ჰყავს და კომპანიის წესდების თანახმად, ჰუანგის თანამდებობიდან გადაყენება დირექტორთა უმრავლესობის გადაწყვეტილებით, მიზეზის არსებობის მიუხედავად, შესაძლებელია.
