ანტარქტიდის ყინულის ქვეშ არსებული ღრმა არხები შესაძლოა ოკეანის თბილ წყალს იჭერდეს, რაც ყინულის დნობის დაჩქარებას და ზღვის დონის აწევას იწვევს, ამის შესახებ ინფორმაცია ჟურნალ Nature Communications-ში გამოქვეყნდა.
მეცნიერები ამბობენ, რომ მცურავი ყინულის ქვეშ, ყინულში წარმოქმნილი გრძელი არხები თბილ წყალს იჭერს, რაც მნიშვნელოვნად აჩქარებს ქვემოდან დნობის პროცესს. მეცნიერები აღნიშნავენ, რომ აღმოსავლეთ ანტარქტიდის რეგიონებიც კი, რომლებიც დიდი ხნის განმავლობაში შედარებით სტაბილურად ითვლებოდა, შესაძლოა უფრო დაუცველი იყოს.
კვლევის ერთ-ერთმა ავტორმა, ტრომსიოში მდებარე iC3 Polar Research-ის წარმომადგენელმა ტორე ჰატერმანმა განმარტა, რომ თბილი წყლის მცირე რაოდენობამაც კი შეიძლება დააჩქაროს დნობა არხებში. შედეგად, ისინი გაფართოვდებიან და შეასუსტებენ მყინვარის სტაბილურობას. მკვლევრები თვლიან, რომ ამან შეიძლება გავლენა მოახდინოს ოკეანის ცირკულაციასა და ანტარქტიდის გარშემო არსებულ საზღვაო ეკოსისტემებზე, რადგან ყინულის დნობის შემდეგ წყალი სამხრეთ ოკეანეში ჩაედინება.
