მოლდოვას ხელისუფლებამ ეროვნული უსაფრთხოების რისკების მოტივით გადაწყვიტა კიშინიოვის აეროპორტში ნავთობის საცავის სახელმწიფო საკუთრებაში დაბრუნება, რომელიც 2005 წლიდან რუსული „ლუკოილის“ კონტროლის ქვეშ იყო, – ამის შესახებ ქვეყნის პრემიერ-მინისტრმა, ალექსანდრუ მუნტეანუმ, ორშაბათს საღამოს განაცხადა.
ნაციონალიზაციის შესახებ გადაწყვეტილება სახელმწიფო უსაფრთხოებისთვის მნიშვნელოვან სფეროებში ინვესტიციების განხილვის საბჭომ მიიღო. მან უარი თქვა „ლუკოილ-მოლდოვას“ მიერ შემდგომი საინვესტიციო საქმიანობის დამტკიცებაზე და დაავალა მას აეროპორტის ნავთობისა და საწვავის კომპლექსის ყველა აქტივის სახელმწიფო საკუთრებაში გადაცემა.
„20 დღეში მოლდოვას რესპუბლიკა აეროპორტის ნავთობისა და გაზის ინფრასტრუქტურის მფლობელი გახდება“, - განაცხადა მუნტეანუმ.
მთავრობამ აღნიშნა, რომ ტერმინალის სახელმწიფო საკუთრებაში დაბრუნება აუცილებელია საავიაციო საწვავის შეუფერხებელი მიწოდებისა და კრიტიკული ინფრასტრუქტურის დასაცავად. ამავდროულად, კომპეტენტური ორგანოები გამოიძიებენ ნავთობტერმინალის 2005 წელს „ლუკოილისთვის“ გადაცემის გარემოებებს.
მოლდაველმა ექსპერტმა სერგეი ტოფილატმა NewsMaker-თან ინტერვიუში ადრე განმარტა, რომ საავიაციო საწვავის სექტორი ყველაზე დაუცველია „ლუკოილის“ წინააღმდეგ სანქციების მიმართ, რადგან თვითმფრინავების საწვავის შევსების მთელი ინფრასტრუქტურა — საწყობებიდან ლოგისტიკამდე — „ლუკოილ-მოლდოვაშია“ კონცენტრირებული.
