კონგოს დემოკრატიულ რესპუბლიკას ებოლას მიმდინარე ეპიდემიასთან საბრძოლველად Merck-ის წარმოებული Ervebo-ს ვაქცინის 70 000 დოზა გამოეყოფა. გადაწყვეტილების შესახებ ჯანდაცვის მსოფლიო ორგანიზაციამ 20 აგვისტოს განაცხადა.
ვაქცინების გამოყოფა კონგოს მთავრობის მოთხოვნის საფუძველზე მოხდა. 70 000 დოზიდან 20 000 მესამე ფაზის კლინიკურ კვლევაში იქნება გამოყენებული, რათა დადგინდეს, რამდენად ეფექტიანია Ervebo მიმდინარე ეპიდემიის გამომწვევი Bundibugyo-ს ვირუსის წინააღმდეგ. დანარჩენი 50 000 დოზა ჯანდაცვის სფეროსა და ეპიდემიასთან ბრძოლის წინა ხაზზე მომუშავე პირებისთვისაა განკუთვნილი.
Ervebo ლიცენზირებული და ჯანმოს მიერ რეკომენდებული ვაქცინაა Ebola virus disease-ისთვის, რომელსაც უფრო გავრცელებული Zaire ebolavirus იწვევს. Bundibugyo-ს ვირუსით გამოწვეული დაავადების წინააღმდეგ ამჟამად ლიცენზირებული ვაქცინა არ არსებობს. ჯანმოს ცნობით, ჯერ უცნობია, უზრუნველყოფს თუ არა Ervebo ადამიანებში Bundibugyo-ს ვირუსისგან დაცვას, თუმცა წინასწარი ლაბორატორიული და ცხოველებზე ჩატარებული კვლევები გარკვეულ შესაძლო ეფექტზე მიუთითებს.
ვაქცინების მიწოდებასა და ვაქცინაციის კამპანიას Gavi, ვაქცინების ალიანსი აფინანსებს. Reuters-ის ინფორმაციით, ორგანიზაცია $7 მილიონს გამოყოფს ვაქცინების კონგოში ტრანსპორტირებისთვის, დამატებით $6 მილიონს კი მაღალი რისკის ტერიტორიებზე ვაქცინაციის პროცესის მხარდასაჭერად. შესაბამისად, გამოცხადებული დაფინანსების ჯამური მოცულობა $13 მილიონია.
კონგოში მიმდინარე ეპიდემია ქვეყნის ისტორიაში შემთხვევების რაოდენობით ყველაზე მასშტაბურია. 19 აგვისტოს გამოქვეყნებული ოფიციალური მონაცემებით, ქვეყანაში 5 021 დადასტურებული შემთხვევა და 2 378 გარდაცვალება იყო აღრიცხული. უკვე 21 აგვისტოს გაეროს წარმომადგენელმა Reuters-ს განუცხადა, რომ გარდაცვლილთა რაოდენობამ 2 500-ს გადააჭარბა. ეპიდემია Bundibugyo-ს ვირუსით არის გამოწვეული.
წყაროები:
https://www.who.int/teams/immunization-vaccines-and-biologicals/diseases/ebola-disease
https://www.who.int/news-room/questions-and-answers/item/ebola-vaccines
