ჩინეთმა და ჰონდურასმა, დიპლომატიური ურთიერთობების დამყარებიდან 3 თვის შემდეგ, თავისუფალი ვაჭრობის შეთანხმების შესახებ მოლაპარაკებები დაიწყეს. ამის შესახებ განცხადება ჩინეთის ვაჭრობის სამინისტრომ გაავრცელა.
ვაჭრობის მინისტრის ვანგ ვენტაოს განცხადებით, FTA მოლაპარაკებები, რომელიც ორშაბათს ტეგუსიგალპაში დაიწყო, ორმხრივი ვაჭრობის სტანდარტების ასამაღლებლად და სხვადასხვა სფეროში მჭიდრო საინვესტიციო თანამშრომლობის გასაღრმავებლად კარგი შესაძლებლობა იქნება.
დიპლომატიური ურთიერთობების დამყარების შემდეგ, ჩინეთის პრეზიდენტმა სი ძინპინმა ივნისში ჰონდურასის პრეზიდენტს ქსიომარა კასტროს პეკინში უმასპინძლა.
მხარეებმა ხელი მოაწერეს 17 დოკუმენტს, რომლებიც ახალი ორმხრივი კავშირების განვითარებას ისახავს მიზნად.
მარტში ჰონდურასის საგარეო საქმეთა სამინისტრომ განაცხადა, რომ იგი აღიარებს ჩინეთს, როგორც „ერთადერთ ლეგიტიმურ მთავრობას, რომელიც წარმოადგენს მთელ ჩინეთს“ და რომ ტაივანი ჩინეთის ტერიტორიის „განუყოფელი“ ნაწილია.
პეკინმა ასევე გახსნა თავისი საელჩო ჰონდურასში გასულ თვეში. კასტროს ვიზიტის წინა დღეს ჩინეთში ჰონდურასიდან 21 ჟურნალისტი ჩავიდა.
