ჩვენს სხეულში ტრილიონობით მიკროორგანიზმი ბინადრობს. უფრო მეტიც, ჩვენს ნაწლავებში იმაზე მეტი მიკრობია, ვიდრე ვარსკვლავები ირმის ნახტომში. ეს მიკრობები სასიცოცხლოდ მნიშვნელოვანია ადამიანის ჯანმრთელობისთვის, მაგრამ მეცნიერები ჯერ კიდევ სწავლობენ, ზუსტად რას აკეთებენ და როგორ გვეხმარებიან ისინი.
კემბრიჯის უნივერსიტეტის მკვლევართა ჯგუფმა ალექსანდრე ალმეიდას ხელმძღვანელობით, შეისწავლეს, როგორ გვიცავენ ნაწლავის გარკვეული ბაქტერიები საზიანო ბაქტერიების ჯგუფის — ენტერობაქტერიებისგან.
ამ ბაქტერიებს შორისაა თუნდაც ნაწლავის ჩხირი (E. coli). ჩვეულებრივ, მცირე ოდენობით ის უსაფრთხოა, მაგრამ თუკი ძალიან გამრავლდება, იწვევს ინფექციებსა და ჯანმრთელობის სხვა პრობლემებს.
ჯგუფმა დაადგინა, რომ ჩვენი ნაწლავების გარემო, რასაც ძირითადად კვება აყალიბებს, დიდ როლს ასრულებს პოტენციურად მავნე ბაქტერიების კონტროლში.
ამ დასკვნამდე მკვლევრები მას შემდეგ მივიდნენ, რაც შეისწავლეს განავლის 12 000-ზე მეტი ნიმუში 45 ქვეყანაში. დნმ-ის სეკვენირების ტექნოლოგიის გამოყენებით, თითოეულ ნიმუშში გამოავლინეს და რაოდენობრივად შეაფასეს მიკრობები. დაადგინეს, რომ ენტერობაქტერიების მქონე ადამიანთა ნაწლავის მიკრობიომი ფუნდამენტურად განსხვავდებოდა იმ ადამიანთაგან, რომლებსაც ენტერობაქტერიები არ ჰქონდათ.
ამ მიკრობებისა და მათი გენების შესწავლით, ზუსტად არის შესაძლებელი იმის პროგნოზირება (დაახლოებით 80 პროცენტით), აქვს თუ არა ადამიანს ნაწლავებში ენტერობაქტერიები. ეს კი აჩვენებს, რომ ჩვენს ნაწლავებში არსებულ ბაქტერიათა ტიპები მჭიდროდ არის დაკავშირებული იმასთან, შეუძლიათ თუ არა საზიანო სახეობებს მათზე კონტროლის აღება.
კიდევ უფრო მეტად შესწავლისას, მკვლევრებმა ბაქტერიების ორი ჯგუფი აღმოაჩინეს — ისინი, რომლებიც ენტერობაქტერიებთან ერთად ცოცხლობდნენ (ე. წ. თანაკოლონიზატორები) და ისეთები, რომლებიც მათთან ერთად იშვიათად იყვნენ წარმოდგენილი (თანაგამომრიცხავები).
განსაკუთრებული მნიშვნელობით გამოირჩეოდა თანაგამომრიცხავ ბაქტერიათა ერთი ტიპი, ფეკალიბაქტერიები. ჩვენს კვების რაციონში შემავალი სხვადასხვა ბოჭკოს დაშლით, ისინი წარმოქმნიან ქიმიურ ნივთიერებებს, რომლებსაც მოკლეჯაჭვიან ცხიმოვან მჟავებს უწოდებენ. ეს კი თავის მხრივ აჩერებდა საზიანო ბაქტერიების, მაგალითად, ენტერობაქტერიების ზრდას.
ვრცლად პირველ არხზე
