აზერბაიჯანმა უკრაინას თითქმის 40 ტონა აღჭურვილობა გადასცა, რომელიც უკრაინის რკინიგზის მუშაობის გაძლიერებასა და ქვეყნის კრიტიკული ინფრასტრუქტურის მხარდაჭერას მოხმარდება.
უკრაინის ენერგეტიკის სამინისტროს ინფორმაციით, აღჭურვილობა სამინისტროში მოქმედი სპეციალური ჰაბის მეშვეობით მიიღეს. უწყების განმარტებით, აღნიშნული ჰაბიდან ტექნიკა თითქმის ყოველდღიურად იგზავნება უკრაინის სხვადასხვა რეგიონში, რაც ენერგეტიკული სექტორისა და სხვა კრიტიკულად მნიშვნელოვანი ინფრასტრუქტურის უწყვეტ ფუნქციონირებას უზრუნველყოფს რუსეთის თავდასხმების მუდმივი საფრთხის პირობებში.
„მადლობას ვუხდით აზერბაიჯანსა და კომპანია STP Global Cable-ს უკრაინასთან სოლიდარობისა და ჩვენი კრიტიკულად მნიშვნელოვანი ინფრასტრუქტურის მხარდაჭერისთვის“, – აღნიშნულია სამინისტროს განცხადებაში.
შეგახსენებთ, რომ 2026 წლის აპრილში უკრაინის პრეზიდენტი ვოლოდიმირ ზელენსკი აზერბაიჯანს ეწვია, სადაც მხარეებმა ექვს ორმხრივ დოკუმენტს მოაწერეს ხელი. ვიზიტის შემდეგ აზერბაიჯანმა უკრაინას ჰუმანიტარული დახმარების ფარგლებში ხუთი სამგზავრო ავტობუსიც გადასცა.
ამასთან, 13 ივლისს შუშაში გამართულ მე-4 გლობალურ მედიაფორუმზე აზერბაიჯანის პრეზიდენტმა ილჰამ ალიევმა კიდევ ერთხელ დაადასტურა უკრაინის მხარდაჭერა. მისი განცხადებით, აზერბაიჯანი უცვლელად უჭერს მხარს უკრაინის ტერიტორიულ მთლიანობას, სუვერენიტეტსა და საერთაშორისოდ აღიარებული საზღვრების ხელშეუხებლობას.
„არცერთი ქვეყნის საზღვრები არ შეიძლება შეიცვალოს ძალისმიერი გზით ან მისი ხალხის თანხმობის გარეშე. ჩვენი პოზიცია ამ საკითხში თანმიმდევრული და მტკიცეა“, – განაცხადა ალიევმა.
