მიმდინარე წელს ეკოტურიზმის განვითარებისთვის, ჯამურად 9 მილიონ ლარზე მეტი დაიხარჯება, ამის შესახებ BM.GE-ის დაცული ტერიტორიების სააგენტოდან აცნობეს.
გარემოს დაცვისა და სოფლის მეურნეობის სამინისტროს პოლიტიკის მიხედვით, დაცული ტერიტორიების სააგენტო, ბუნების კონსერვაციისა და მონიტორინგის პარალელურად, ეკოტურიზმის განვითარებას აგრძელებს და წელს, მასშტაბური პროექტების განხორციელებას აანონსებს.
"2025 წელს, დაცული ტერიტორიების სააგენტო არაერთ მნიშვნელოვან პროექტს განახორციელებს, რისთვისაც, ჯამში 9 მილიონ ლარზე მეტი დაიხარჯება, როგორც სახელმწიფო ბიუჯეტიდან, ისე კერძო ინვესტიციის ფარგლებში. ამ ეტაპზე, აღსანიშნავია, თბილისის ეროვნულ პარკში ეკოტურისტული ინფრასტრუქტურის განვითარების პროექტი. აღნიშნულის ფარგლებში, მოეწყობა ვიზიტორთა ცენტრები, ბილიკების ქსელი შესაბამისი ინფრასტრუქტურით, ბავშვთა გასართობი სივრცეები, ამფითეატრი და სხვა ობიექტები, რაც პარკს უფრო მიმზიდველს გახდის ბუნებაში დასვენებისა და ლაშქრობის მოყვარულებისთვის.
საქართველოს რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდთან თანამშრომლობით, საქართველოს ერთ-ერთ ყველაზე პოპულარულ მარშრუტზე, კერძოდ ჯუთა-როშკა-ომალოზე 240 კმ-მდე საცხენოსნო და საფეხმავლო ბილიკების მოწყობის სამუშაოები დასრულდება, თანამდევი ინფრასტრუქტურითა და სასტუმროს ტიპის კომფორტული კოტეჯებით. ეს მოგზაურებს საშუალებას მისცემს უნიკალური ბუნება და შთამბეჭდავი პეიზაჟები აღმოაჩინონ.
გარდა ამისა, ბირთვისის კანიონის ბუნების ძეგლის მიმდებარედ დასრულდება ეკოტურისტული ინფრასტრუქტურის მშენებლობა. ინფრასტრუქტურის განვითარების შედეგად, ბირთვისის კანიონზე მოეწყობა ვიზიტორთა ცენტრი სოფელ ამლევის მხრიდან, გადასახედი პლატფორმა, სამი დაკიდებული ხიდი, საქანელა, კოტეჯები, ვია ფერატა და ზიპლაინი”, - აცხადებს დაცული ტერიტორიების სააგენტო.
უწყებაში აღნიშნავენ, რომ მსხვილი პროექტების გარდა, ინფრასტრუქტურული განვითარება, განახლება და სიახლეების დამატება მუდმივად დღის წესრიგში დგას, რათა საქართველოს დაცული ტერიტორიებზე მოგზაურობა გახდეს მეტად მრავალფეროვანი, უსაფრთხო და კომფორტული.
