ევროკომისია გეგმავს, სოციალური ქსელი „იქსი“, რომელსაც მილიარდერი და აშშ-ს პრეზიდენტ დონალდ ტრამპის ახლო მოკავშირე ილონ მასკი ფლობს, 1 მილიარდ დოლარზე მეტი ოდენობის თანხით დააჯარიმოს. ამ ინფორმაციას „ნიუ იორკ ტაიმსი“ (NYT) ევროკავშირის რამდენიმე ოფიციალურ პირზე დაყრდნობით ავრცელებს, რომელთა ვინაობას ამერიკული გამოცემა არ ასახელებს. ეს სავარაუდო ფინანსური სანქცია იქნება პირველი მსხვილი სასჯელი ევროკავშირის ახალი წესების შეუსრულებლობისთვის, რომლებიც დეზინფორმაციისა და უკანონო კონტენტის წინააღმდეგ ბრძოლას შეეხება.
ევროკავშირის ზოგიერთი ოფიციალური პირის თქმით, ისეთი ამერიკული ინტერნეტ-გიგანტები, როგორებიც არიან „მეტა“, „გუგლი“ და „იქსი“, შესაძლოა, ტრამპის მიერ ოთხშაბათს გამოცხადებული ახალი ტარიფების საპასუხოდ, ევროკავშირის სამიზნედ იქცნენ. თუმცა, ევროკავშირიდან იმპორტირებულ საქონელზე 20-პროცენტიანი ტარიფის დაწესებაზე რაიმე საპასუხო ზომების მიღებამდე, ევროპული ქვეყნების პოლიტიკოსებს ტრამპის ადმინისტრაციასთან შესაძლო კომპრომისებზე მოლაპარაკება სურთ.
„ნიუ იორკ ტაიმსის“ წყაროების თქმით, სოციალურ ქსელ „იქს“-ის საქმეზე მსჯელობისას, ევროკომისიამ ყურადღება გაამახვილა იმაზე, გამოიწვევდა თუ არა უპრეცედენტო ჯარიმა ურთიერთობების შემდგომ გაუარესებას ტრამპთან, რომელმაც მასკი სამთავრობო ხარჯების შემცირებაზე პასუხისმგებელი ჯგუფის ხელმძღვანელად დანიშნა. თავად მასკი ევროკავშირის რეგულაციებს მკაცრად აკრიტიკებს და მოსალოდნელია, რომ საქმეს ევროკავშირის სასამართლოში გაასაჩივრებს, რომლის განხილვასაც, ჯარიმის დაკისრების შემთხვევაში, შესაძლოა, რამდენიმე წელი დასჭირდეს.
ამერიკული გაზეთის ერთ-ერთი წყაროს ინფორმაციით, ბრიუსელი ჯარიმის დაკისრებას ზაფხულში გამოაცხადებს. ეს იქნება პირველი მნიშვნელოვანი სანქცია ციფრული სერვისების რეგულაციის ფარგლებში, რომელიც სოციალურ ქსელებს უკანონო კონტენტის წაშლას და დეზინფორმაციის წინააღმდეგ ბრძოლაში პროაქტიული ქმედებების განხორციელებას ავალდებულებს. თუმცა, „ნიუ იორკ ტაიმსის“ ცნობით, ევროკავშირის ოფიციალური პირები აღნიშნავენ, რომ მასკს მიეცემა ჯარიმის თავიდან აცილების შანსი, თუ შეცვლის თავის მიდგომას ევროკომისიის მოთხოვნების მიმართ.
მასკმა, „იქს“-ში (ყოფილი „ტვიტერი“) მისვლის შემდეგ, სამსახურიდან გაუშვა ათასობით თანამშრომელი, რომლებიც პოსტების შინაარსის კონტროლზე იყვნენ პასუხისმგებელნი. ამათან, მრავალი კრიტიკოსის აზრით, სოციალური ქსელი „იქსი“ წარმოადგენს სივრცეს დეზინფორმაციის, მანიპულაციური ან კონსპირაციული გზავნილების გავრცელებისთვის.
წყარო: "საზოგადოებრივი მაუწყებელი"
