2024 წელს თბილისში სამშენებლო სექტორის ბრუნვამ ზრდის ტენდენცია აჩვენა. იმატა პროექტების მოცულობამ და ღირებულებამ. აღნიშნული წლის პირველ კვარტალში ბრუნვამ 2.6 მილიარდი ლარი შეადგინა, მეორე კვარტალში 3.2 მილიარდი, მესამეში 4.1 მილიარდი, ხოლო მეოთხე კვარტალში 4.4 მილიარდ ლარს მიაღწია. 2024 წელს ქვეყანაში სამშენებლო აქტივობის მნიშვნელოვან ზრდაზე მიუთითებს როგორც გაცემული ნებართვების, ასევე ექსპლუატაციაში მიღებული ობიექტების რაოდენობა.
აღნიშნულ წელს მთლიანად საქართველოში 12 080 სამშენებლო ნებართვა გაიცა, საიდანაც 46.8% თბილისზე მოდიოდა. 2024 წელს საქართველოში მშენებლობისთვის განკუთვნილი ფართობების საერთო მოცულობამ 12,040.4 ათასი კვადრატული მეტრი შეადგინა, რაც 28.4%-ით მეტია 2023 წლის მაჩვენებლებზე. ამავე წელს ექსპლუატაციაში მიღებული ობიექტების რაოდენობა 3,604-მდე გაიზარდა, რაც 13.3%-ით მეტია 2023 წლის მონაცემებთან შედარებით.
2025 წლის თებერვალში მშენებლობის ღირებულების ინდექსი წინა წელთან შედარებით თითქმის 5%-ით გაიზარდა, რაც ძირითადად განპირობებული იყო სამშენებლო დარგში დასაქმებულთა ხელფასის მატებით და სამშენებლო მასალების გაძვირებით. აღნიშნული მონაცემები ბიზნესისა და ტექნოლოგიების უნივერსიტეტის ანალიტიკური პლატფორმის მიერ ჩატარებულ კვლევაშია თავმოყრილი.
საქსტატის მონაცემების მიხედვით, 2025 წლის აპრილში მშენებლობის ღირებულების ინდექსი წინა თვესთან შედარებით 0.6%-ით შემცირდა. ცვლილება, ძირითადად განპირობებული იყო მშენებლობის დარგში დაქირავებით დასაქმებულთა საშუალო თვიური ნომინალური ხელფასის 1.3%-იანი კლებით. თუმცა, 2025 წლის აპრილში წინა წლის შესაბამის თვესთან შედარებით მშენებლობის ღირებულების ინდექსი 5.1%-ით გაიზარდა. საქსტატის ინფორმაციით, ინდექსის ზრდა, უმეტესწილად გამოწვეული იყო მშენებლობის დარგში დაქირავებით დასაქმებულთა საშუალო თვიური ნომინალური ხელფასის 18.3%-იანი ზრდით და სამშენებლო მასალების 2.2%-იანი გაძვირებით.
რა ვითარებაა თბილისის სამშენებლო და უძრავი ქონების ბაზარზე? სამშენებლო სექტორში არსებულ ტენდენციებთან დაკავშირებით ,,კომერსანტი” ,,იდააფ არქიტექტორების” დამფუძნებელ ნანა ზაალიშვილს ესაუბრა. მისი თქმით, შავი კარკასის მშენებლობის ფასი დაახლოებით 35%-ით არის გაზრდილი. არქიტექტორი მიიჩნევს, რომ ფასი ხარისხთან შესაბამისობაში არ არის. ქაოსური მშენებლობები და მაღალი ფასი კი კითხვის ნიშნებს აჩენს.
,,შავი კარკასის მშენებლობის ფასი გაიზარდა 35%-ით, დაახლოებით. მშენებლობების რაოდენობა გაცილებით მაღალი პროცენტითაა გაზრდილი წინა წლებთან შედარებით. არ ვფიქრობ, რომ ფასი და ხარისხი შესაბამისობაშია. მნიშვნელოვანია იყოს ორგანიზაცია ან ინსტიტუტი, რომელიც ფასის ზრდის კანონიერებას შეისწავლის ხოლმე, უძრავი ქონების ასეთი ქაოსური და ძვირი ბაზარი კითხვებს აჩენს.’’- აცხადებს ნანა ზაალიშვილი.
არქიტექტორი მიიჩნევს, რომ საჭიროა ახალი აშენებული საცხოვრებელი ფართების ხარისხისა და უსაფრთხოების მონიტორინგი. ნანა ზაალიშვილი განმარტავს, რომ თანამედროვე ბინები თითქმის იდენტური დაგეგმარებით შენდება და ისინი მცხოვრებთა კომფორტს ვერ უზრუნველყოფს. მისივე თქმით, მაღალ ფასთან ერთად პრობლემურია საცხოვრებელი ფართების მცირე მოცულობა, რაც ადამიანის ჰარმონიულ და კომფორტულ ცხოვრებას ვერ უზრუნველყოფს.
,,დღევანდელი საცხოვრებელი ბინების ხარისხის და უსაფრთხოების შესახებ მონიტორინგი პრაქტიკულად არ არსებობს, შესაბამისად მეც არ მაქვს ამაზე პასუხი (რამდენად უსაფრთხო და ხარისხიანია), რაც თავისთავად დიდი პრობლემაა. როგორც არქიტექტორს, მაწუხებს ის ტენდენციები, რაც დღეს ასე თვალსაჩინოა: ,,ყუთი’’ ბინები თითქმის ერთნაირი გეგმარებით, სადაც მინიმალური სივრცეა კომფორტისთვის და ცხოვრების საჭიროებებისთვის. თუ მართლა გვინდა, რომ შევქმნათ განვითარებული, მაღალი სოციალური კულტურის მქონე საზოგადოება, ჩვენ არ უნდა გავაუბრალოოთ მათი ცხოვრების ხარისხი. ადამიანებს არ უნდა შევთავაზოთ სივრცეები, სადაც ისინი უბრალოდ ცხოვრობენ, არამედ უნდა შევთავაზოთ ისეთი გარემო, სადაც კეთილდღეობა, კომფორტი და ჰარმონია ყოველდღიურობის ნაწილი იქნება. ეს მხოლოდ ბინების ზომის საკითხი არაა, ეს არის ჩვენი საზოგადოების მოსაფიქრებელი უფრო ღრმა, ფუნდამენტური გამოწვევა.’’- აცხადებს ნანა ზაალიშვილი.
