მართალია, ნოემბერი საქართველოში თბილი ამინდებით დაიწყო, მაგრამ სამწუხაროდ, ამინდის მკვეთრი ცვლილებით გაგრძელდება. უახლოეს დღეებში როგორც დასავლეთ, ისე აღმოსავლეთ საქართველოში ტემპერატურა საგრძნობლად დაიკლებს, მოსალოდნელია წვიმა, მაღალმთიან რეგიონებში კი თოვლი. სინოპტიკოსების პროგნოზით, ნალექიანი ამინდი კვირის ბოლომდე შენარჩუნდება, შემდეგ კი შედარებით გამოიდარებს.
როგორი იქნება ნოემბრის მეორე ნახევარი, როდის უნდა ველოდოთ პირველ ყინვებს და როგორი ზამთრისთვის უნდა მოვემზადოთ - ამ საკითხებზე გარემოს ეროვნული სააგენტოს კლიმატური პროგნოზების სამსახურის უფროსი ხათუნა ქოქოსაძე გვესაუბრება.
- ქალბატონო ხათუნა, ნოემბერი უჩვეულოდ თბილია თუ უბრალოდ ასე გვეჩვენება?
- ნოემბერი ჯერ ახლა დაიწყო, თუმცა დღეს უკვე დასავლეთ საქართველოში წვიმს. საღამოს უმეტეს რაიონში ნალექია მოსალოდნელი, ზოგან - ძლიერიც. არამდგრადი, წვიმიანი ამინდი კვირის ბოლომდე გაგრძელდება.
ტემპერატურაც მკვეთრად დაიკლებს - დასავლეთ საქართველოს დაბლობში დაახლოებით 14-15 გრადუსამდე, ხოლო მაღალმთიან რეგიონებში თოვლი იქნება.
- აღმოსავლეთ საქართველოში როდის გაუარესდება ამინდი?
- ხვალიდან ნალექიანი ამინდი აღმოსავლეთ საქართველოშიც გადმოინაცვლებს. აქაც დაბლობში წვიმა იქნება, მთიან და მაღალმთიან რაიონებში კი თოვლია მოსალოდნელი. ტემპერატურა აქაც მკვეთრად დაიკლებს, დაახლოებით 14-15 გრადუსამდე იქნება.
- რაც შეეხება თბილისს, როდის იგრძნობს დედაქალაქი ამინდის გაუარესებას?
- დედაქალაქშიც ხვალიდან ამინდი გაუარესდება. ქარიც იქნება, შემდეგ ნალექის ინტენსივობა შედარებით შესუსტდება, ზოგან გამოიდარებს, თუმცა კვირის ბოლომდე აქაც ტემპერატურის კლებაა მოსალოდნელი. საკმაოდ დაბალი ტემპერატურა იქნება, დაახლოებით 14-15 გრადუსამდე დაიკლებს.
- დღეს შეიძლება ითქვას, რომ თბილი ამინდების ბოლო დღეა?
- დღის ბოლოს ტემპერატურა დედაქალაქშიც დაიკლებს.
- როდის უნდა ველოდოთ ნოემბრისთვის დამახასიათებელ სუსხს? თვის მეორე ნახევარში ხომ არ არის მოსალოდნელი ყინვები თბილისში და საქართველოს სხვა ქალაქებში?
- ნოემბრის თვეში ტემპერატურა ნორმის ფარგლებში იქნება. აღმოსავლეთ საქართველოს ბარისთვის საშუალო ტემპერატურა დაახლოებით 8 გრადუსია, თუმცა ცალკეულ პერიოდებში შესაძლებელია ტემპერატურის მატება 18-19 გრადუსამდე. ასეთი ძალიან თბილი პერიოდები და მაღალი ტემპერატურები ნოემბრის დასაწყისისთვისაც იყო მოსალოდნელი და ნოემბრის მეორე ნახევარშიც არის შესაძლებელი.
თუმცა ხვალიდან ტემპერატურა დაიკლებს. ყინვა, რა თქმა უნდა, ამ ეტაპზე არ ჩანს, მაგრამ საკმაოდ გრილი ამინდები იწყება და ეს მდგომარეობა კვირის ბოლომდე გაგრძელდება.
- ნოემბრის საერთო პროგნოზი როგორია - ნორმალური ტემპერატურული რეჟიმი გვექნება, თუმცა ნალექიანი ამინდი?
- დიახ, ტემპერატურა ნორმის ფარგლებში იქნება, ნალექები კი ნორმაზე მეტი რაოდენობით არის მოსალოდნელი.
- ეს ნიშნავს, რომ წელს თოვლიანი ზამთარი გვექნება?
- დიახ, თოვლიანი ზამთარი იქნება, განსაკუთრებით მთიან და მაღალმთიან რეგიონებში.
- თბილისშიც უნდა ველოდოთ თოვლს? განსაკუთრებით აინტერესებთ ახალი წლის დღეები, იქნება თუ არა თოვლი დედაქალაქში?
- დიახ, თუმცა ახალი წლის დღეებისთვის პროგნოზზე საუბარი ჯერ ძალიან ადრეა. ახლა ამ სეზონის პროგნოზზე მუშაობას ვიწყებთ და ამ ეტაპზე ჯერ საბოლოო სურათი არ გვაქვს.
- ბოლო პერიოდში გახშირდა საუბარი კლიმატის ცვლილებით გამოწვეულ ექსტრემალურ ამინდებზე. რამდენად მოსალოდნელია წელს საქართველოში ტემპერატურის მკვეთრი ცვალებადობა?
- კლიმატის ცვლილებას საქართველოზე საკმაოდ მნიშვნელოვანი გავლენა აქვს, განსაკუთრებით ზაფხულზე. ჩვენ თუ წლევანდელ ზაფხულს გავიხსენებთ, გარკვეულწილად ესეც შეიძლება კლიმატის ცვლილებას დავუკავშიროთ.
მთელი ზაფხულის განმავლობაში ევროპაში ძალიან მაღალი ტემპერატურა იყო, ხანგრძლივი სიცხის ტალღებიც დაფიქსირდა. ჩვენთან კი, პირიქით, საკმაოდ ხშირად იყო ჩრდილოეთიდან წამოსული შედარებით გრილი ჰაერის მასები.
მაშინ, როცა ვფიქრობდით, რომ ტემპერატურა ნორმაზე მაღალი იქნებოდა, ჩრდილოეთით, კავკასიონის ჩრდილოეთით და აღმოსავლეთ ევროპის ჩრდილოეთ ნაწილში, გავრცელებული იყო მაღალი წნევის არეალი და გრილი ჰაერის მასები.
ეს არ აძლევდა საშუალებას ცხელი ჰაერის მასებს, უფრო აღმოსავლეთით, ჩვენი ტერიტორიისკენ გავრცელებულიყო. სწორედ ამიტომ გვქონდა ზაფხულის განმავლობაში შედარებით გრილი ამინდი და მაღალი ტემპერატურა ისე ვერ ვრცელდებოდა საქართველოში, როგორც ევროპის სხვა ქვეყნებში.
- დასასრულს, ხვალიდან საქართველოში აცივებას ველოდებით?
- დიახ, ხვალიდან, საღამოდან უკვე ტემპერატურის საკმაოდ მკვეთრ კლებას ველოდებით.
