საქართველოში ძვირადღირებული და ექსკლუზიური ავტომობილების რაოდენობა იზრდება. ავტოპარკში სულ უფრო მეტი Lamborghini, Ferrari, Bentley და Rolls-Royce ჩნდება, ხოლო ისეთი იშვიათი ბრენდების წარმომადგენლებიც, როგორიც Bugatti-ა, ქვეყანაში უკვე რამდენიმე ერთეულით არის წარმოდგენილი.
„საქსტატის“ მონაცემებით, განსაკუთრებით თვალსაჩინოა Lamborghini-ს რაოდენობის ზრდა. თუ გასული წლის ანალოგიურ პერიოდში საქართველოში ამ ბრენდის 78 ავტომობილი იყო რეგისტრირებული, მიმდინარე მონაცემებით მათი რაოდენობა 127-მდეა გაზრდილი. ეს ერთ წელიწადში დაახლოებით 63%-იან ზრდას ნიშნავს.
მნიშვნელოვანი მატებაა Ferrari-ს შემთხვევაშიც – ქვეყანაში ამ ბრენდის ავტომობილების რაოდენობა 90-დან 111-მდე გაიზარდა. ზრდის ტენდენცია შეინიშნება Bentley-სა და Rolls-Royce-ის შემთხვევაშიც, თუმცა ბაზარზე შედარებით იშვიათი ბრენდების რაოდენობა კვლავ ერთნიშნა მაჩვენებლით განისაზღვრება.
„საქსტატის“ მონაცემებზე დაყრდნობით, საქართველოში რეგისტრირებული ძვირადღირებული ავტომობილების რაოდენობა გასული წლის ანალოგიურ პერიოდთან შედარებით შემდეგნაირად შეიცვალა:
- Lamborghini – საქართველოში 127 ავტომობილია რეგისტრირებული, გასული წლის ანალოგიურ პერიოდში კი 78 იყო. რაოდენობა 49 ერთეულით, დაახლოებით 63%-ით გაიზარდა;
- Bentley – ქვეყანაში 177 ავტომობილია რეგისტრირებული, ერთი წლის წინ კი 151 იყო;
- Rolls-Royce – საქართველოში 126 ავტომობილია რეგისტრირებული, გასული წლის ანალოგიურ პერიოდში – 113;
- Ferrari – რეგისტრირებული ავტომობილების რაოდენობა 111-ს შეადგენს, წინა წლის 90-ის ნაცვლად;
- Maybach – საქართველოში 6 ავტომობილია რეგისტრირებული, წინა წლის ანალოგიურ პერიოდში კი 5 იყო.
- Bugatti – ქვეყანაში ამ ბრენდის 5 ავტომობილია რეგისტრირებული, ერთი წლის წინ კი 4 იყო;
- Aston Martin – რაოდენობა 40-მდე გაიზარდა, წინა წლის 33-თან შედარებით;
- McLaren – რეგისტრირებული ავტომობილების რაოდენობა უცვლელია და 9-ს შეადგენს.
ამ რვა ბრენდის მიხედვით, საქართველოში რეგისტრირებული ავტომობილების ჯამური რაოდენობა 601-ს აღწევს. გასული წლის ანალოგიურ პერიოდში ეს მაჩვენებელი 483 იყო, რაც დაახლოებით 24.4%-იან ზრდას ნიშნავს.
ცნობისთვის, სტატისტიკის ეროვნული სამსახურის მონაცემებით, 2026 წლის მესამე კვარტლის ბოლოს საქართველოში რეგისტრირებული ავტომობილების საერთო რაოდენობამ 2 010 195 ერთეული შეადგინა. აქედან 984 369 ავტომობილი თბილისშია რეგისტრირებული.