ბიტკოინის ფასი 80 ათას დოლარს გადასცდა და ბოლო სამ თვეზე მეტი ხნის განმავლობაში უმაღლეს ნიშნულს მიაღწია. აზიის სავაჭრო სესიაზე კრიპტოვალუტის ღირებულებამ 81 237,94 დოლარს მიაღწია, რაც მაისის შუა პერიოდის შემდეგ ყველაზე მაღალი მაჩვენებელია.
Reuters-ის ინფორმაციით, მოგვიანებით ბიტკოინი დაახლოებით 80 323,24 დოლარად ივაჭრებოდა.
კრიპტოვალუტის ფასის ზრდის ერთ-ერთ მთავარ ფაქტორად აშშ დოლარის შესუსტება სახელდება. ინვესტორების განწყობაზე ასევე იმოქმედა აშშ-ის ფინანსთა სამინისტროს გეგმამ, გაზარდოს გრძელვადიანი ობლიგაციების გამოსყიდვა და ამ გზით მათი სარგებლის ზრდა შეაკავოს.
ბიტკოინის ზრდას დამატებითი იმპულსი აშშ-ის პრეზიდენტის, დონალდ ტრამპის განცხადებამაც მისცა. გასულ კვირას მან კონგრესს მოუწოდა, მიიღოს კანონპროექტი, რომელიც კრიპტოვალუტების სექტორისთვის უფრო მკაფიო წესებს დაადგენს. მას შემდეგ ბიტკოინის ფასი დაახლოებით 16%-ით გაიზარდა.
მხოლოდ აგვისტოში ბიტკოინი უკვე 28%-ით არის გაძვირებული. თუ ზრდის ტენდენცია გაგრძელდა, მიმდინარე თვის მაჩვენებელი შესაძლოა 2024 წლის ნოემბრის შემდეგ ყველაზე დიდი ყოველთვიური ზრდა გახდეს.
ბაზრის მონაწილეები ასევე აკვირდებიან აშშ-ის ფინანსთა მინისტრის, სკოტ ბესენტის, უწყების ნაბიჯებს. ობლიგაციების ბაზრის სტაბილიზაციისკენ მიმართულმა ზომებმა დოლარზე ზეწოლა გაზარდა და კრიპტოვალუტებისთვის უფრო ხელსაყრელი გარემო შექმნა.
20 აგვისტოს ბიტკოინის ფასი პირველად ორ თვეზე მეტი ხნის განმავლობაში 70 ათას დოლარს გადასცდა. მაშინ ზრდას ხელი შეუწყო აშშ-ის ფინანსთა სამინისტროს მიერ სახაზინო ობლიგაციების სარგებლის შემცირებისკენ მიმართულმა ზომებმა და დონალდ ტრამპის შეხვედრამ კრიპტოინდუსტრიის წარმომადგენლებთან.
ამასთან, კრიპტოვალუტის ბაზარზე უსაფრთხოების რისკებიც რჩება. ბოლო პერიოდში ჰაკერების თავდასხმების შედეგად დაახლოებით 4 500 კრიპტოსაფულე გატეხეს, საიდანაც 86 მილიონი დოლარის ღირებულების ბიტკოინი მოიპარეს.
