2026 წლის მესამე კვარტალში საქართველოს ბიზნეს ასოციაციის (BAG) ბიზნეს კლიმატის ინდექსმა 48.4 ქულა შეადგინა, რაც გასული წლის შესაბამის პერიოდთან შედარებით 5.2 ქულით მეტია.
ინდექსის კომპონენტების მიხედვით, მომავლის მოლოდინები მნიშვნელოვნად უსწრებს მიმდინარე მდგომარეობის შეფასებას: კერძოდ, მიმდინარე მდგომარეობის ინდექსი 29.7 ქულაზე დაფიქსირდა, ხოლო მომდევნო ექვსი თვის მოლოდინის ინდექსმა 68.6 ქულა შეადგინა. ორივე მაჩვენებელი დადებით ზონაშია (-100-დან +100-მდე სკალაზე), რაც იმას ნიშნავს, რომ პოზიტიურად განწყობილი კომპანიების წილი უარყოფითად განწყობილებს აჭარბებს.
სექტორულ ჭრილში, დასაქმების ბარომეტრი წინა კვარტალთან შედარებით 3.8 ქულით გაიზარდა. დასაქმების ზრდის ყველაზე მაღალი მოლოდინი მშენებლობის (+44.8) და მრეწველობის (+22.2) სექტორებში დაფიქსირდა. საპირისპიროდ, დასაქმების შემცირების ტენდენცია გამოიკვეთა მომსახურების (-9.8) და ვაჭრობის (-2.6) სფეროებში.
კვლევის თანახმად, გამოკითხული კომპანიების უმრავლესობა ოპტიმისტურადაა განწყობილი საინვესტიციო საქმიანობის მიმართაც. 2026 წელს ჯამური ინვესტიციების ზრდას კომპანიების 68% ელოდება, 27% მიიჩნევს, რომ ინვესტიციები უცვლელი დარჩება, ხოლო კლებას მხოლოდ 4% პროგნოზირებს.
ცნობისთვის: BAG ინდექსი საქართველოს ბიზნეს ასოციაციის, PMC კვლევითი ცენტრისა და გერმანული ifo ეკონომიკური კვლევების ინსტიტუტის ერთობლივი პროექტია, რომელიც ყოველკვარტალურად ქვეყნდება. აღნიშნული გამოკითხვა მიმდინარე წლის 1-დან 16 სექტემბრამდე პერიოდში ჩატარდა.
