საქართველო საერთაშორისო ვაჭრობაზე ყველაზე მეტად დამოკიდებული ქვეყნების რეიტინგში 170 სახელმწიფოს შორის 57-ე ადგილს იკავებს. Visual Capitalist-ის მიერ 9 ნოემბერს გამოქვეყნებული კვლევის თანახმად, ქვეყანაში ექსპორტისა და იმპორტის ჯამური მოცულობა მთლიანი შიდა პროდუქტის (მშპ-ის) 100.6%-ს უტოლდება. ამ მაჩვენებლით საქართველო იმ ქვეყნების ჯგუფშია, რომელთა საგარეო სავაჭრო ბრუნვაც ეკონომიკის წლიურ მოცულობას აღემატება.
რეიტინგის მიხედვით, საქართველოს მეზობელი ქვეყნებიდან სომხეთი 54-ე ადგილზეა, ვაჭრობისა და მშპ-ის 101.7%-იანი თანაფარდობით. აზერბაიჯანი 85-ე პოზიციას იკავებს — 79.8%-იანი მაჩვენებლით, თურქეთი კი 132-ე ადგილზეა, სადაც საგარეო ვაჭრობის მოცულობა მშპ-ის 49.9%-ს შეადგენს. ამგვარად, საქართველოს მაჩვენებელი ჩამორჩება სომხეთისას, თუმცა აღემატება აზერბაიჯანისა და თურქეთის მონაცემებს.
მსოფლიო რეიტინგში პირველ ადგილს ლუქსემბურგი იკავებს, სადაც ექსპორტისა და იმპორტის ჯამი მშპ-ის 349.9%-ს შეადგენს. მეორე ადგილზეა სან-მარინო — 341%-ით, მესამეზე კი სინგაპური — 320.3%-ით. პირველ ხუთეულში ასევე შედიან ირლანდია (240%) და მალტა (219%). კვლევის მიხედვით, 20 ყველაზე მეტად სავაჭროდ დამოკიდებული ქვეყნიდან 16-ის მოსახლეობა 10 მილიონზე ნაკლებია, რაც მცირე ეკონომიკების საერთაშორისო ბაზრებზე უფრო დიდ დამოკიდებულებას უკავშირდება.
აღსანიშნავია, რომ აღნიშნული მაჩვენებელი ექსპორტისა და იმპორტის ჯამურ ღირებულებას ქვეყნის მშპ-ს ადარებს და არა მხოლოდ ექსპორტის წილს.
Visual Capitalist-ის ანალიზი მსოფლიო ბანკის მონაცემებს ეყრდნობა; მონაცემების უმეტესობა 2025 წელს ასახავს, ცალკეული ქვეყნებისთვის კი 2022-2024 წლების სტატისტიკაა გამოყენებული.
