თბილისში, ტურიზმის ეროვნულ ადმინისტრაციასთან ქართველი გიდების ერთი ნაწილი აქციას მართავს. გიდები ამბობენ, რომ უსამსახუროდ რჩებიან და ეს მალე ძალიან ბევრს შეუქმნის პრობლემას.
მათი განცხადებით, უცხოენოვანი გიდები კანონმა უნდა დაავალდებულოს ფლობდნენ სახელმწიფო ენას და იყვნენ ამ ქვეყნის მოქალაქეები.
„ეს პრობლემა პანდემიამდე გაჩნდა, მაგრამ განსაკუთრებით გამძაფრდა ბოლო ერთი წელია. ჩვენ, აქაური გიდები ვრჩებით სფეროს მიღმა. გიდი ქვეყნის ელჩია, ის აცნობს უცხოელებს ამ ქვეყნის ისტორიას, კულტურას. დღეს კი, ამ ისტორიას ძალიან ბევრი უცხოელი გიდი არასწორად ყვება და ქვეყნის იმიჯს აზიარებს“, - აცხადებს აქციის ერთ-ერთი მონაწილე გიდი ქეთი ბურნაძე.
გიდები აცხადებენ, რომ უცხოელი გიდები ისე წარადგენენ საქართველოს, როგორც სურთ:
„ხან ირანის პროვინცია ვართ და ხან რუსეთის გუბერნია“.
აქციის მონაწილე კიდევ ერთი გიდი ნატალია ანდრონიკაშვილი ამბობს, რომ ის, რაც ესმით თავად გიდებს ტურების დროს, ამას ვერ ისმენენ ვერც ჩინოვნიკები და ვერც ტურისტული კომპანიების ხელმძღვანელები.
„ქვეყნის ისტორია ტოტალურად მახინჯდება, კულტურას დაკნონებულად წარმოაჩენენ - ამას ზოგი უმეცრებით აკეთებს და ზოგი შეგნებულად. ფაქტია, რომ სფეროს სჭირდება მოწესრიგება“.
14 მაისს აქციაზე შეკრებილი გიდები ითხოვდნენ, რომ ყველა გიდმა და მძღოლმაც უნდა იცოდეს სახელწმიფო ენა ქართული და იყოს საქართველოს მოქალაქე და ეს განისაზღვროს კანონით.
ტურიზმის შესახებ კანონზე მსჯელობა ჯერ არ დასრულებულა. ჯერ უცნობია, საბოლოოდ როგორ დარეგულირდება ამ კანონით გიდების საკითხი.
