საქართველოში პროფესიული საგანმანათლებლო პროგრამების განმახორციელებელი 75 დაწესებულება და 689 საგანმანათლებლო პროგრამაა ხელმისაწვდომი - 5 წლის განმავლობაში პროფსასწავლებლების კურსდამთავრებულთა დასაქმების მაჩვენებელი ძირითადად მზარდი იყო.
უფრო კონკრეტულად, „ინტერპრესნიუსის“ მიერ განათლებისა და მეცნიერების სამინისტროდან გამოთხოვილი საჯარო ინფორმაციის თანახმად, 2020 წელს პროფესიული სასწავლებლების კურსდამთავრებულთა დასაქმების მაჩვენებელი, 2019 წელს ვარდნის შემდეგ, 2018 წლის მაჩვენებელს დაუბრუნდა, 2021 წელს კი, კიდევ უფრო გაიზარდა.
კერძოდ, დასაქმების მაჩვენებელი 2017 წლის კურსდამთავრებულებში 60% იყო; 2018 წელს - 62%; 2019 წელს - 50%; 2020 წელს - 69%; 2021 წელს - 74%.
თუმცა, დასაქმების მაჩვენებლის ზრდის მიუხედავად, აღსანიშნავია, რომ პროფესიული საგანმანათლებლო პროგრამების კურსდამთავრებულთა კვლევების თანახმად, უმეტეს შემთხვევაში, დასაქმებულთა მხოლოდ ნახევარია საკუთარი პროფესიით დასაქმებული, მეორე ნახევარი კი სხვა მიმართულებით მუშაობს. ასევე, დასაქმების და პროფესიით დასაქმების მაჩვენებელი, ძირითადად, უფრო დაბალია ახალგაზრდებში.
