ლარის გამყარების ფონზე ექსპორტიორების შემოსავლები მცირდება. როგორც ხილისა და ბოსტნეულის ექსპორტიორთა ასოციაციის ხელმძღვანელი „ბიზნესპარტნიორთან“ საუბრისას განმარტავს, კომპანიების ნაწილმა საერთაშორისო ბაზრებზე პროდუქციის გატანა უკვე შეაჩერა.
"ექსპორტის მაჩვენებლებზე უკვე ასახულია ლარის გამყარება. ეროვნული ვალუტის არსებული ნიშნული ექსპორტისთვის ნეგატიურია, რადგან ექსპორტი ძვირდება. სამომავლოდ, ეს ადგილობრივ წარმოებასაც დაარტყამს და შედეგად, გრძელვადიან პერსპექტივაში იაფი იმპორტი ჩაანაცვლებს ადგილობრივ წარმოებას. ზოგმა კომპანიამ უკვე შეაჩერა ან შეამცირა წარმოება.
თუ კურსი გააგრძელებს გამყარებას ეს პირდაპირპროპორციულად აისახება ექსპორტის შემცირებასა და იმპორტის ზრდაზე.“-განმარტა ვახტანგ ბეჟიტაშვილმა.
მისივე თქმით, ლარის გამყარების ფონზე ექსპორტიორების შემოსავლები შემცირებულია, შესაბამისად მათ ნაკლები სტიმული აქვთ რომ წარმოების მასშტაბები გაზარდონ.
„თუ ექსპორტიორს საერთაშორისო ბაზრებზე ფასი არ აძლებს მოგებაზე გასვლის საშუალებას, ბუნებრივია რომ ექსპორტის მაჩვენებლები მცირდება. ამ ეტაპზე ჩვენი პროდუქცია არის ძვირი და არ ვართ კონკურენტუნარიანი გლობალურ ბაზრებზე.“- განმარტა ვახტანგ ბეჟიტაშვილმა.
ცნობისთვის, წლის დასაწყისიდან დღემდე ლარი დოლართან მიმართებით 21, ხოლო ევროსთან 14 თეთრით არის გამყარებული.
რაც შეეხება ექსპორტის მაჩვენებლებს, საქსტატის მონაცემებით, პირველ კვარტალში ექსპორტი გაზრდილია და 1 მლრდ 400 მლნ დოლარს აჭარბებს, თუმცა ცალკეულ მაჩვენებლებში არაერთი მნიშვნელოვანი საექპორტო პოტენციალის მქონე პროდუქტის უცხოურ ბაზრებზე რეალიზაიაა შემცირებული. მათ შორის, განახევრებულია ფეროშენადნობების ექსპორტი, 20-დან 30%-მდეა შემცირებული მინერალური და მტკნარი წყების, სპილენძის მადნების და აზოტოვანი სასუქების ექსპორტი.
