2023 წელს საქართველოში 30 ათასი ახალი ბინის მშენებლობა დაიწყო, 2024–2025 წლებში კი ეს მაჩვენებელი 26–28 ათას ბინას შორის მერყეობს.
მნიშვნელოვანია, რომ პირველადი ბაზრის გაყიდვები წელიწადში დაახლოებით 20 ათას ბინას შეადგენს. შესაბამისად, სამომავლოდ მოთხოვნასა და მიწოდებას შორის არსებული 10-ათასიანი სხვაობა ახალი მყიდველების მოძიების ხარჯზე უნდა მოხერხდეს, რაც სავარაუდოდ დეველოპერების მხრიდან ფასების ზრდის შეზღუდვის წინაპირობა გახდება.
Galt & Taggart-ში აცხადებენ, რომ ამ დროისთვის უძრავი ქონების ბაზარზე მოთხოვნა სტაბილური, წლის ბოლომდე პროგნოზი კი ოპტიმისტურია.
„მოთხოვნის გაუმჯობესების ნიშნები ჩანს და ჩვენი შეხედულება წლის ბოლომდე სექტორისადმი დადებითად რჩება. ფასების ზრდის ტემპზე მიწოდება ახდენს გავლენას, სადაც ნებართვების გაცემა კვლავ არ მცირდება და 8 თვის ჭრილში 3%-იანი ზრდაც კია. ეს იმ ფონზე, როცა 2024 წელსაც მნიშვნელოვანი ზრდა დაფიქსირდებოდა. გაზრდილი კონკურენციისა და მშენებლობების რაოდენობის ფონზე ბუნებრივია, რომ ფასების ზრდა მარტივი არ არის.
2023 წელს თითქმის 30 ათასი ახალი ბინის მშენებლობა დაიწყო, 2024–2025 წლებში კი ეს მაჩვენებელი ისევ 26–28 ათასის ფარგლებშია, მაშინ როცა პირველადი ბაზრის გაყიდვების რიცხვი წლიურად 20 ათას ნიშნულზეა. შესაბამისად, დაახლოებით 10 ათასიანი სხვაობა მოთხოვნასა და მიწოდებას შორის. ეს ის სეგმენტია, რომელიც ახალმა მოთხოვნამ უნდა აითვისოს, რაც ართულებს დეველოპერების მხრიდან ფასების ზრდას.
ჯამურად 40 ათასი ბინა იყიდება, საიდანაც ნახევარი მოდის პირველადი ბაზრიდან. შესაბამისად, პირიქით, ვფიქრობ, რომ პირველადი ბაზარი გაიზრდება, რადგან დეველოპმენტი უფრო მეტია, ვიდრე ადრე გვქონდა. არ მგონია, რომ 20 ათასი ბინის გაყიდვები შემცირდეს — ეს საკმაოდ ჯანსაღი ციფრია.
ეკონომიკური ზრდა, ხელფასების მატება, ურბანიზაციის დონის ზრდა, ოჯახის საშუალო ზომის შემცირება და ემიგრანტების გადმორიცხვები მნიშვნელოვან წილს წარმოადგენენ მოთხოვნაში. თბილისში სწორედ ამ ფაქტორების ერთობლიობა ქმნის მოთხოვნას.“ – განაცხადა „საქმიანი დილის“ ეთერში თავყელიშვილმა.
მოთხოვნა მზარდია ბათუმშიც, სადაც უძრავი ქონება განსაკუთრებით საინვესტიციო მიზნებისთვის არის მიმზიდველი. თუმცა მოკლევადიანი სტაბილურობის მიუხედავად, ანალიტიკოსები აღნიშნავენ, რომ საშუალო და გრძელვადიან პერიოდში მიწოდების ტემპის აჩქარებაა მოსალოდნელი.
თუ წინა წლებში ბათუმში წელიწადში 9–10 ათასი ბინა შენდებოდა, მომდევნო პერიოდში ეს მაჩვენებელი 12–15 ათასამდე გაიზრდება, ეს კი იმას ნიშნავს, რომ უძრავი ქონების ბაზარზე გაცილებით მეტი გასაქირავებელი ბინა გამოჩნდება. არსებული მიწოდების ასათვისებლად კი ერთი მხრივ ახალი ბაზრების გააქტიურება, მეორე მხრივ კი ქალაქის ინფრასტრუქტურასის განვითარება იქნება საჭირო
„ბათუმში გვაქვს საინვესტიციო მოთხოვნა — ეს არის პოსტსაბჭოთა სივრციდან, არაბული ქვეყნებიდან, ისრაელიდან და შორეული აზიიდანაც ჩანს ინტერესი. აქ ჯერ კიდევ დიდი სივრცეა ასათვისებელი. უძრავი ქონება შეფუთულია როგორც საინვესტიციო პროდუქტი. მიუხედავად იმისა, რომ 2025 წელს გარკვეული მოლოდინები არსებობდა, ბათუმში ეს ფაქტორი მნიშვნელოვანი არ აღმოჩნდა — გაყიდვები წინა წლის ნიშნულზე უფრო მაღალია. რაც შეეხება ფასებს, ზრდის ტემპის შემცირება არც აქ არის საგრძნობი, როგორც თბილისშიც.
მოკლე ვადაში პრობლემებს ვერ ვხედავთ, მაგრამ საშუალო და გრძელვადიან პერიოდში მოსალოდნელია, რომ მიწოდების ტემპი უფრო დაჩქარდება, ვიდრე ეს წინა წლებში იყო. თუ აქამდე 9–10 ათასი ბინა შენდებოდა, ახლა 12–15 ათასამდეა გაზრდილი. ეს გამოიწვევს იმას, რომ ბაზარზე გაცილებით მეტი გასაქირავებელი უძრავი ქონება გამოჩნდება, ვიდრე აქამდე იყო. ხოლო თუ ვთანხმდებით იმაზე, რომ ბათუმი მიმზიდველია მაღალი ამონაგების გამო, ბუნებრივია, რომ თუ ბინების რაოდენობა გაიზრდება, ან ფასი შემცირდება ან ახალი ნაკადი იქნება ასათვისებელი. ამასთან, საჯარო ინფრასტრუქტურამაც უნდა შეძლოს ამ ტემპს აჰყვეს, რათა ბათუმმა გაუძლოს გაზრდილ ტურისტულ ნაკადებს.“ - განაცხადა თავყელიშვილმა.
