2025 წლის თებერვალში jobs.ge-ზე 5 589 ვაკანსია გამოქვეყნდა, - ამის შესახებ აღნიშნულია PMCG-ის ანგარიშში. გარდა ამისა, ვაკანსიების რაოდენობა თებერვალში, წინა თვესთან შედარებით, 8.8%-ით, ხოლო 2024 წლის თებერვალთან შედარებით 19.8%-ით შემცირდა.
დასაქმების პორტალ DASAQMEBA.GE-ის დამფუძნებელი, პაატა მამულაშვილი „კომერსანტთან“ კვლევის შედეგებს ადასტურებს. მისი თქმით, ბოლო პერიოდია, ვაკანსიების რაოდენობა იკლებს, ხოლო კვალიფიციური კადრების მოძიება სულ უფრო რთულდება. განსაკუთრებით მწვავე სიტუაცია მომსახურების სფეროშია.
„ვაკანსიებზე როგორც მოთხოვნა, ასევე მიწოდება შემცირებულია. აღსანიშნავია, რომ დასასაქმებელი კადრების რაოდენობა ამ ეტაპზე ძალიან მცირეა და მათი მოძიება და ბიზნესისთვის შეთავაზება ძალიან გვიჭირს. ბოლო პერიოდია, CV-ები ნაკლები ინტენსივობით იტვირთება. მოთხოვნის და მიწოდების შემცირება განსაკუთრებით თვალშისაცემი მომსახურების სფეროშია. დაახლოებით ორი წელია, მოთხოვნა არის მაგალითად კონსულტანტებზე, მიმტანებზე, მოლარეებზე, მაგრამ მიწოდება ძალიან ცოტაა.
ვაკანსიების რაოდენობა კი დაახლოებით ოქტომბრიდან შემცირდა. ინფორმაცია ხელფასებთან დაკავშირებით არ გვაქვს, რადგან ზოგიერთ ვაკანსიას ხელფასი მინიშნებული საერთოდ არ აქვს“,- აღნიშნა პაატა მამულაშვილმა.
