ლავრენტი ბერიას კოჯორში მდებარე ცნობილი აგარაკის ბედი ობიექტის გასხვისებიდან ორ წელიწად-ნახევრის შემდეგაც გაურკვეველია. ინვესტორს ამ დრომდე არც ის გადაუწყვეტია რა ფუნქციური დატვირთვა ექნება უძრავ ქონებას და ვერც იმას ამბობს, მოხდება თუ არა არქიტექტურულად გამორჩეული, 120 წლის წინ აშენებული შენობა-ნაგებობებისთვის ძველი, ისტორიული იერსახის შენარჩუნება.
სამთავრობო კამპანიის ფარგლებში, დიდი ფასდაკლებით ნაყიდი უძრავ-მოძრავი ქონების ბედით „კომერსანტი“ კიდევ ერთხელ დაინტერესდა. „იბეროტელის“ დირექტორი ივანე ბარბაქაძე „კომერსანტთან“ განმარტავს, რომ ბერიას აგარაკი ისეთივეა, როგორიც შეიძინეს, ამ დრომდე არანაირი სამუშაოები არ დაწყებულა და პროექტის განხორციელება არც უახლოეს მომავალში იგეგმება.
„წლების წინ რამდენიმე მიმართულება იკვეთებოდა თუ რა ფუნქცია უნდა ჰქონოდა აღნიშნულ უძრავ ქონებას, თუმცა საბოლოოდ პარტნიორებს შორის შეთანხმება არ მომხდარა. რა დანიშნულების, რა მიმართულების, რა კონცეფციის ობიექტი შეიძლება იყოს იქ, ამაზე ჯერ ვერ შევჯერდით.
პროექტი არის გაჩერებული, სამუშაოები გაჩერებულია, უფრო სწორად არანაირი პროგრესი და წინსვლა არ არის. შენობა არის ისეთივე როგორიც შევიძინეთ, არაფერი დაგვიგეგმავს და არაფერი განგვიხორციელებია.
პარტნიორები ჯერ არ დაბრუნებიან ამ პროექტს და მის განხილვას, შესაბამისად ის, ასე ვთქვათ, დაკონსერვებულია.
რაც შეეხება ვალდებულებებს, ჩვენ ქონების შეძენის დროს მხოლოდ ერთადერთი ვალდებულება დაგვეკისრა, რაც გულისხმობდა კონკრეტული რაოდენობის თანხის გადახდას, რომელიც უკვე დაფარულია, სხვა რაიმე სახის ვალდებულება მაგალითად ვადებთან დაკავშირებით არ გვაქვს. ვფიქრობ პროექტის განხორციელება არც უახლოეს მომავალში მოხდება“, - ამბობს ივანე ბარბაქაძე და დამატებით დეტალებზე საუბრისგან თავს იკავებს.
კოჯრის არქიტექტურულად გამორჩეული აგარაკები 2021 წლის 15 აპრილს შპს „იბეროტელმა“ იყიდა. „იბეროტელმა“ ორი წლის წინ უძრავი ქონება საწესდებო კაპიტალის სახით შეიტანა შპს „მეიდან პარკში“, რომლის 50%-ს „პარკ ქეფითალ მენეჯმენტი“ ფლობს, 50%-ს კი შპს მეიდანზე (შპს „პარკ ქეფითალ მენეჯმენტის“ 100%-იანი წილის მფლობელია, „ბაზის ბანკის“ ყოფილ გენერალური დირექტორი ზურაბ ციხისთავი, შპს „მეიდანზე“ 100% კი ზაზა ნიშნიანიძეს ეკუთვნის).
კოჯრის გამორჩეული აგარაკის ახალ მფლობელს საინვესტიციო ვალდებულებები არ აქვს, თუმცა აუქციონის აღწერილობაში ვკითხულობთ, რომ საპრივატიზებო ობიექტზე მიმდინარეობს წარმოება კულტურული მემკვიდრეობის უძრავი ძეგლის სტატუსის მინიჭების თაობაზე. შესაბამისად, ინვესტორი ცნობილი შენობების იერსახის შეცვლას, სავარაუდოდ, ვერ შეძლებს.
სამთავრობო კამპანიის „100 საინვესტიციო შეთავაზება ბიზნესს“ ფარგლებში სახელმწიფომ 22 560 კვ.მ. არასასოფლო-სამეურნეო დანიშნულების მიწის ნაკვეთი და მასზე განთავსებული ნაგებობები კოჯორში 2 504 000 ლარად გაასხვისა, ფაქტობრივად ინვესტორმა 1 კვ.მ მიწა 110 ლარად შეიძინა, მაშინ როდესაც კოჯორში 1 კვ.მ ფასი 150 დოლარიდან იწყება.
გავრცელებული ინფორმაციით, აგარაკი რუსეთის ბოლო მეფისნაცვლის მოღვაწეობის პერიოდშია აშენებული. ამ შენობაში 1921–24 წლებში რეპრესირებულთა დაობლებული ბავშვების თავშესაფარი იყო. გასაბჭოების შემდეგ კი კოჯორში ყველა შენობა საქალაქო სამმართველოს გადაეცა. მხატვრულ-არქიტექტურულად გამორჩეული ლურჯი შენობა, იმდროინდელი შინაგან საქმეთა სამინისტროს და უშიშროების საბჭოს აგარაკი იყო. საბჭოთა კავშირის დაშლის შემდეგ ტერიტორიაზე ბავშვთა ბანაკი მოეწყო, მოგვიანებით კი ტერიტორია მიატოვეს და წლების განმავლობაში სახელმწიფო ბალანსზე ირიცხებოდა.
რატომ გაყიდა სახელმწიფომ არასაბაზრო ფასად და ვალდებულების გარეშე ბერიას ცნობილი აგარაკი? - „კომერსანტი“ თემაზე მუშაობას აგრძელებს და პასუხებს შესაბამისი უწყებებისგან ელოდება.
