აშშ-ის პრეზიდენტმა დონალდ ტრამპმა ღაზის სექტორის „მშვიდობის საბჭოს“ შემადგენლობა დაასახელა, - ინფორმაციას თეთრი სახლი ავრცელებს.
თეთრი სახლის განცხადებით, „მშვიდობის საბჭო“, რომელსაც აშშ-ის პრეზიდენტი უხელმძღვანელებს, ღაზას დროებით მმართველობას ზედამხედველობას გაუწევს და სექტორის რეკონსტრუქციის შემდგომ ეტაპს წარმართავს.
„საბჭოს ხედვის განხორციელების მიზნით, დონალდ ტრამპის ხელმძღვანელობით, აღმასრულებელი საბჭო შეიქმნა, რომელიც შედგება დიპლომატიის, განვითარების, ინფრასტრუქტურისა და ეკონომიკური სტრატეგიის სფეროებში გამოცდილი ლიდერებისგან“, - ნათქვამია თეთრი სახლის განცხადებაში.
დონალდ ტრამპის ბრძანებით საბჭოს შემადგენლობაში შემდეგი პირები არიან: აშშ-ის სახელმწიფო მდივანი მარკო რუბიო, დონალდ ტრამპის სპეციალური წარმომადგენელი სტივ უიტკოფი, დიდი ბრიტანეთის ყოფილი პრემიერ-მინისტრი ტონი ბლერი, ტრამპის სიძე ჯარედ კუშნერი, ბიზნესმენი და მილიარდერი მარკ როუენი, მსოფლიო ბანკის პრეზიდენტი აჯაი ბანგა და ტრამპის მრჩეველი რობერტ გაბრიელი.
ასევე, თეთრი სახლის ინფორმაციით, ახლო აღმოსავლეთში გაერო-ს ყოფილი წარმომადგენელი, ნიკოლაი მლადენოვი საბჭოს ფარგლებში ღაზაში უმაღლესი წარმომადგენელი იქნება.
