საქართველოს კალათბურთელთა ნაკრები ევროპის 2025 წლის ჩემპიონატზე მეორე მატჩს იტალიასთან გამართავს. შეხვედრა თბილისის დროით 16:00 საათზე დაიწყება, პირდაპირ რეპორტაჟს საქართველოს პირველი არხი და პირველი არხი სპორტი შემოგთავაზებთ.
ურთიერთშეხვედრები
საქართველოს ნაკრები ისტორიაში ყველაზე მეტჯერ სწორედ იტალიას შეხვდა – 13-ჯერ. სტატისტიკა არასახარბიელოა – ცამეტივე შემთხვევაში „სკუადრა აძურამ“ გაიმარჯვა.
თუმცა, არის ერთი საინტერესო ტენდენცია: 1990-იან და 2000-იან წლებში ჩვენს გუნდს იტალიასთან გამარჯვების შანსიც არ ჰქონია. ბოლო დროს კი იყო რამდენიმე მატჩი, რომლებშიც ქართველები ძალიან ახლოს იყვნენ მოგებასთან.
გავიხსენოთ 2015 წელი, როცა ტრიესტეს ტურნირზე საქართველო ბოლო წამებზე დამარცხდა, არადა, იტალიელმა არბიტრებმა იმ მატჩში გადამწყვეტ მომენტში აშკარა ჯარიმა არ დააფიქსირეს, რასაც შეეძლო მატჩის ბედი ჩვენს სასარგებლოდ გადაეწყვიტა.
შემდეგ იყო ევრობასკეტი 2017. საქართველოს ნაკრებმა იტალიელებთან თანაბრად ითამაშა, გადამწყვეტი აღმოჩნდა ბოლო წუთზე დანიელ ჰაკეტის მიერ ჩაგდებული ორქულიანი. თუმცა, უკანასკნელ წამებზე ქართველებიც ძალიან ახლოს იყვნენ მატჩის ოვერტაიმში გადაყვანასთან.
მსოფლიოს 2023 წლის ჩემპიონატის შესარჩევზე იტალიის ნაკრებს თბილისში თითქმის მოვუგეთ. ბოლო შეტევა თორნიკე შენგელიამ ზუსტი ტყორცნით დაასრულა, თუმცა მსაჯებმა ვიდეოეკრანზე გაამეორეს და აღმოჩნდა, რომ ტყორცნისას სათამაშო დრო ამოწურული იყო.
