„უოტფორდის“ (სადაც გიორგი ჩაკვეტაძე თამაშობს) სპორტული დირექტორის თანაშემწემ, ვალონ ბეჰრამმა დაადასტურა, რომ კლუბი „დინამო თბილისიდან“ ნიკოლოზ ჩიქოვანის ტრანსფერს ახორციელებს, თუმცა ჯერ იჯარით ბელგიურ „შარლერუაში“ გაუშვებს – ამის შესახებ გამოცემა Watfordobserver-ი სტატიას აქვეყნებს.
„თავდამსხმელ ნიკოლოზ ჩიქოვანს „უოტფორდი“ „დინამო თბილისიდან“ დაიმატებს და შემდეგ გარკვეული პერიოდით იჯარით გაუშვებს. ფორვარდი, რომელმაც ცხრა მატჩი ჩაატარა ქართულ გუნდში, საინტერესო ტალანტად მიიჩნევა და კლუბს არ სურდა, რომ მისი შეძენის შანსი ხელიდან გაეშვა.
რატომ ჩქარობენ ჩიქოვანის ტრანსფერს? გიორგი ჩაკვეტაძის თანამემამულის მიმართ ინტერესს სხვა კლუბებიც იჩენენ და „უოტფორდმა“ ეს გარიგება იანვრამდე რომ გადადოს, შესაძლოა, ტალანტი ხელიდან გაუშვას.
18 წლის ფეხბურთელმა ცხრა მატჩი ჩაატარა „დინამო თბილისის“ შემადგენლობაში, ის საქართველოს 19-წლამდელთა ნაკრების წევრია.
ბოლო წლებში „უოტფორდმა“ რამდენიმე ახალგაზრდა და ნიჭიერი ფეხბურთელი დაიმატა, რომლებმაც შემდეგ კლუბს წარმატება მოუტანეს. ჩიქოვანის ტრანსფერიც ამ კატეგორიას განეკუთვნება, ის უფრო მომავალზეა გათვლილი, თუმცა, შესაძლოა, ქართველი თავდამსხმელი ძირითად შემადგენლობას იანვრიდან შეუერთდეს“.
