ამერიკული ტექნოლოგიური გიგანტის, Nvidia-ის აღმასრულებელი დირექტორის, ჯენსენ ჰუანგის ქონება ერთ დღეში 7.4 მილიარდი დოლარით შემცირდა. ამის მიზეზი კომპანიის აქციების ვარდნა გახდა, რომელიც ხელმძღვანელის პირადი ურთიერთობებისა და სავარაუდო ჯაშუშური კავშირის გარშემო დაწყებულ გამოძიებას მოჰყვა. ამის შესახებ Forbes წერს.
Forbes-ის მონაცემებით, 9 ნოემბერს, საფონდო ბირჟის გახსნიდან პირველ ნახევარ საათში, ჰუანგის ქონება 162.2 მილიარდიდან 154.7 მილიარდ დოლარამდე შემცირდა. შედეგად, მსოფლიოს უმდიდრესი ადამიანების რეიტინგში მან მერვედან მეათე ადგილზე გადაინაცვლა. ამავე პერიოდში Nvidia-ს აქციები დაახლოებით 4%-ით დაეცა, ხოლო წინასაბაზრო ვაჭრობისას კლება 7%-საც აღწევდა.
სკანდალის საფუძველი The New York Times-ის მიერ გავრცელებული ინფორმაცია გახდა. გამოცემის ცნობით, აშშ-ის სადაზვერვო სამსახურები მიიჩნევდნენ, რომ ჰუანგს ახლო ურთიერთობა ჰქონდა ჩინეთის მოქალაქე ალის ჰუანგთან, რომელიც, ამერიკული მხარის ვარაუდით, პეკინისთვის ინფორმაციის შეგროვებაში მონაწილეობდა. ქალი ადრე სინგაპურში დაფუძნებულ მონაცემთა ცენტრების კომპანიაში, Megaspeed International-ში მუშაობდა. ჯენსენ ჰუანგმა Nvidia-ს თანამშრომლებისთვის გაგზავნილ წერილში ქორწინების გარეშე ურთიერთობა დაადასტურა და ოჯახსა და კოლეგებს ბოდიში მოუხადა.
8 ნოემბერს Nvidia-ს დირექტორთა საბჭომ დამოუკიდებელი გამოძიების დაწყება გამოაცხადა. პროცესში გარე იურისტებიც ჩაერთვებიან. კომპანიის განცხადებით, ამ ეტაპზე არ არსებობს საფუძველი ვარაუდისთვის, რომ საფრთხე შეექმნა ეროვნულ უსაფრთხოებას ან Nvidia-ს კონფიდენციალურ ინფორმაციას. ჰუანგი თანამდებობაზე რჩება და გამოძიებასთან სრულ თანამშრომლობას აპირებს. ჩინეთის საგარეო საქმეთა სამინისტრომ კი ჯაშუშობის შესახებ ბრალდებებს უსაფუძვლო უწოდა და ისინი ჩინეთის წინააღმდეგ ცილისწამებად შეაფასა.
