მარკეტერების საქმიანობის ყველაზე ნათელი წერტილი ხმაურიანი კამპანიები და რეკლამებია, თუმცა მათი მიზანი რეკლამის შექმნა კი არა, ბიზნესის ზრდის უზრუნველყოფაა. ამიტომ მარკეტერებს დღეს მხოლოდ კომუნიკაცია აღარ ჰყოფნით, მათ უნდა ესმოდეთ ფასების ფორმირება, პროდუქტის სტრატეგია და სხვა ბერკეტები, რომლებიც ზრდას მართავს. კვლევებიც ადასტურებს, რომ ბევრი მარკეტერი კვლავ მხოლოდ კომუნიკაციას თვლის თავის პასუხისმგებლობად, რაც არასწორია.
ამ თემის გარშემო წლის განმავლობაში მარკეტინგის სპეციალისტებს შორის რამდენიმე საკვანძო ფრაზა გაჟღერდა, რომლებსაც ქვემოთ გაგაცნობთ.
„არ არის საჭირო მუდმივად ახალი რეკლამების შექმნა“
თავად მარკეტერები აღიარებენ, რომ მარკეტერების სნეულებაა ყოველი პროექტისთვის ახალი რეკლამების შექმნა, რამაც რეკლამა ზედმეტად გაცვეთილ ფორმად აქცია. სანაცვლოდ ისინი კამპანიების ხელახლა გაშვებას გვთავაზობენ და მაგალითად Amazon-ის „Joy Ride“-ის საშობაო რეკლამა მოჰყავთ, რომელმაც მეორედაც საუკეთესო შეფასება მიიღო.
„ბრენდის ნამდვილ წარმატებას მისი ფასებიც განსაზღვრავს“
პროდუქტი ხან ძვირად ეჩვენებათ, ხან იაფად, თუმცა არსებობს მარკეტინგული მიდგომები, რომლებიც გვასწავლის, რომ ბრენდები, რომლებიც მაღალი ხარისხით პოზიციონირდებიან, ფასებსაც შესაბამისს ადებენ და ამით პრემიუმსეგმენტს აყალიბებენ.
მართალია, პრაქტიკაში ბევრს არ შეუძლია ფასის ზრდის ისე მართვა, რომ ამან მომხმარებლის პროტესტი არ გამოიწვიოს, მაგრამ თეორია, რომ მარკეტინგის ერთ-ერთი მთავარი სტრატეგიული ამოცანაა, დაარწმუნოს ადამიანები, თუნდაც, მაღალფასიანი პროდუქტის შეძენაში, უცვლელი რჩება.
„დღესდღეობით ბრენდები ეჭვის ქვეშ არიან”
წამოვიდა ტენდენცია, რომ მოხმარებლები დიდ ბრენდებს ნაკლებად ენდობიან, რის გამოც კომპანიები ინფლუენსერებსა და კრეატორებზე დიდ რესურსს ხარჯავენ. მომხმარებლები დღეს უფრო მეტად ენდობიან ადამიანურ, ორგანულ ხმას, ვიდრე კორპორაციულ მესიჯებს. შეიძლება ითქვას, ეს წლევანდელი ერთ-ერთი ყველაზე ძლიერი კონტექსტური ცვლილებაა ბრენდის კომუნიკაციებში.
„მარკეტინგს შეუძლია შეცვალოს არა მხოლოდ გაყიდვები, არამედ კომპანიის ენერგიაც“
მარკეტერებმა ბიზნესის მიზნების რეალურად გამარტივებასა და ბიზნესის ზრდის გენერირებაში უნდა იპოვონ თავიანთი ძალა. ეს წელი აღმოჩნდა ერთგვარი „აღზრდის წელი“: მარკეტერები სწავლობენ, რომ მათი მნიშვნელობა მეტია, ვიდრე მხოლოდ კამპანიების დაგეგმვა-შესრულება.
„მარკეტერები უნდა იყვნენ პროტაგონისტები“
მარკეტერები ხშირად მოკლევადიან კამპანიებში იკარგებიან. „პროტაგონისტის მიდგომა“ კი ნიშნავს:
- უფრო ფართო ხედვას
- დიდი მიმართულებების დასახვას
- ინდუსტრიის, საზოგადოებისა და კატეგორიის გაანალიზებას
ეს არის გზა, რომ მარკეტერები ორგანიზაციაში კვლავ სტრატეგიულ ძალად დარჩნენ.
„Cannes-ზე გამარჯვება მომხმარებელთან გამარჯვებას არ ნიშნავს“
ტოდ კაპლანი Kraft Heinz-იდან მარკეტერებს უხერხულ შეკითხვას უსვამს:
„Cannes Lions-ზე გამარჯვება ნიშნავს, რომ მომხმარებელიც მოიპოვეთ?”
მისი აზრით, ინდუსტრიის ნაწილი იტყუებს თავს, რადგან ჯილდოს რეალური მნიშვნელობა არასოდეს ექნება, თუ პროდუქტი არ ვარგა და მხოლოდ ლამაზ ვიზუალზე ან ფრთიან ფრაზებზე მუშაობთ.
ერთი სიტყვით, 2025 წელი იყო წელი, როდესაც მარკეტერებმა კვლავ გადახედეს საკუთარ როლს და მივიდნენ დასკვნამდე, რომ: მარკეტინგი = ზრდას. მთავარი თემები, რომლებიც ყველაზე მეტჯერ გაისმა, იყო: მარკეტინგის სტრატეგიული გავლენა, ფასის ძალა და ბრენდის ღირებულება, განმეორებითი კამპანიების ეფექტიანობა და მომხმარებლის ნდობა.
